روسیا بۆ وەستانی جەنگ سێ مەرجی هەیە

میدیاکان

ئاڵای روسیا و ئۆکراین

سێرگی لاڤرۆڤ وەزیری دەرەوەی روسیا سێ مەرجی وڵاتەکەی بۆ وەستانی جەنگ لەگەڵ ئۆکراین ئاشکرا دەکات و رایدەگەیەنێت: ئەم داواکاریانە بنەڕەتین و سازشیان لەسەر ناکەین.

وەزیری دەرەوەی روسیا نوێترین هەڵوێستی وڵاتەکەی لەسەر وەستانی جەنگی روسیا- ئۆکراین راگەیاند و سێ مەرجی نوێی ئاشکرا کرد، کە یەکەمیان بریتی یە لەوەی دان بەو دۆخەی ئێستادا بنرێت کە بەهۆی ئۆپراسیۆنەکانی وڵاتەکەیەوە هاتووەتە کایەوە و داوای کرد بە رەسمی دان بنرێت بەوەی کە هەر یەک لە نیمچە دوورگەی قرم و سیڤاستۆپۆل، کۆماری دۆنێتسک، کۆماری لوهانسک و ناوچەی زاپۆریژیا و خێرسۆن بەشێکن لە خاکی روسیا.

 پەیوەست بە مەرجی دووەمیش، لاڤرۆڤ ئاشکرای کردووە: پێویستە گەرەنتی ئەمنی بە روسیا بدرێت، کە پشت ئەستور بە یاسا بێت و گەرەنتی بکەن کە ململانێکان دووبارە نابنەوە.
 کۆتا مەرجی روسیاش ئەوەیە، ئۆکراین نەچێتە ناو هیچ هاوپەیمانییەکی سەربازی و نەبێتە خاوەن چەکی ئەتۆمی و وڵاتانی ناتۆش خاکەکەی بە مەبەستی سەربازی بەکار نەهێنن.

ئەمەش لە کاتێکدایە، جەنگی ئۆکراین- روسیا لە مانگی شوباتدا پێدەنێتە ساڵی پێنجەمییەوە و روسیا زیاتر لە %21ی خاکی ئۆکراینی کۆنترۆڵکردووە و ئۆکراینیش بە مەرجی وەرگرتنەوەی ئەو ناوچانە ئامادەیە جەنگ رابگرێت، بۆیە تاوەکو ئێستا بەرەو پێشچوونێکی ئەوتۆ لە وەستانی جەنگ لە نێوان ئەو دوو وڵاتەدا بەدینەهاتووە.

PUKMEDIA