ئەمڕۆ پۆستی جێگری دووەمی سەرۆکی ئەنجومەنی نوێنەران یەکلایی دەکرێتەوە

راگەیاندنی ئەنجومەنی نوێنەران

دانیشتنی ئەنجومەنی نوێنەران

ئەمڕۆ 30ی12ی2025، بڕیارە  ئەنجومەنی نوێنەرانی عیراق درێژە بە دانیشتنەکەی بدات و لە خولی سێیەمی دەنگداندا پۆستی جێگری دووەمی سەرۆکی ئەنجومەنەکە یەكلایی بکاتەوە.

دانیشتنی خولی سێیەمی ئەنجومەنی نوێنەرانی عیراق بۆ یەكلاكردنەوەی پۆستی جێگری دووەم پاشنیوەڕی ئەمڕۆ بەڕێوەدەچێت، ئەمەش دوای ئەوە دێن شەوی رابردوو، لە خولی یەكەم و دووەمى دەنگداندا هیچ كام لە رێبوار كەریم كاندیدی رەوتی هەڵوێست و  شاخەوان عەبدوڵڵا كاندیدی پارتی نەیانتوانی دەنگی پێویست بەدەستبهێنن، كە پێویستە بۆ وەرگرتنی پۆستەکە دەنگی زۆرینەی رەها بهێنن، کە 166 دەنگە و نیوە +یەكی دەنگی ژمارەی پەرلەمانتارانە.

لە خولی یەکەمی دەنگداندا رێبوار کەریم 153 دەنگ و شاخەوان عەبدوڵڵا 119 دەنگی بەدەستهێناوە و 21 دەنگيش پووچەڵ بوون، هاوکات لە خولی دووەمدا، رێبوار کەریم 156 دەنگ و شاخەوان عەبدوڵڵا 102 دەنگی بەدەستهێناوە و 22 دەنگيش پووچەڵ بوون.

ئەمەش لەکاتێکدایە، لە یەكەم كۆبوونەوەی خولی شەشەمی ئەنجومەنی نوێنەرانی عیراقدا كە 306 پەرلەمانتار ئامادەبوون، هەیبەت حەلبوسی كاندیدی حزبی تەقەدوم بە بەدەستهێنانی 208 دەنگ  وەك سەرۆكی ئەنجومەنی نوێنەرانی عیراق و عەدنان فەیحان كاندیدی چوارچێوەی هەماهەنگی شیعەكانیش بە بەدەستهێنانی 177 دەنگ  بە  جێگری  یەكەمی سەرۆكی ئەنجومەنەكە هەڵبژێردران.

PUKMEDIA