د. لەتیف رەشید: شەهیدان و زانایان و کەسایەتییە نەتەوەییەکانمان لە بیردەبێت

نوسینگەى راگەیاندنى سەرۆکایەتى کۆمار

د. لەتیف جەمال رەشید سەرۆککۆماری عیراق

ئەمڕۆ شەممە 20ى12ى2025، د. لەتیف رەشید، سەرۆککۆماری عیراق لە رێوڕەسمی یادکردنەوەی بیست و سێیەمین ساڵیادی شەهیدبوونی ئایەتوڵڵا سەید محەمەد باقر ئەلحەکیم و یادکردنەوەی رۆژی شەهیدانی عیراق رایگەیاند: بەرپرسیارێتی نیشتمانی و ئەخلاقی و پەروەردەیی وامان لێدەکات، هەمیشە قوربانیدانی شەهیدان و زانایان و کەسایەتییە نەتەوەییە گەورەکان لەبیرو هزرماندا بێت و چیرۆکە قارەمانەکانیان وەک بەشێکی دانەبڕاو لە مێژوو و ناسنامەی وڵات بۆ نەوەکانی داهاتوو بگوازینەوە.

ئاماژەیبەوەشدا: ئێمە یادی رۆژی شەهیدانی عیراق دەکەینەوە، رێز لەو قوربانییە مەزنانە دەگرین، کە رۆڵەکانی گەلی ئازیزمان لە هێزە ئەمنییەکان بەخشیویانە هەر لە سوپا، پۆلیس، هێزەکانی حەشدی شەعبی و پێشمەرگە لە پێناو ئازادی و دیموکراسی، و لە جەنگی دژ بە دیکتاتۆری و تیرۆردا.

ئەوەشىخستەڕوو: ساڵیادی پڕ لە ئازاری شەهیدبوونی ئایەتوڵڵای گەورە سەید محەمەد باقر حکیم دەکەینەوە، کەسایەتی گەورەی ئایینی و نەتەوەیی کە دژی دیکتاتۆرییەت تێکۆشانی کرد، ئەو دەنگە ژیرانەی کە داوای میانڕەوی و ئازادی و دادپەروەری کۆمەڵایەتی و پێکەوەژیانی ئاشتیانەیان دەکرد، کە بە گیانی خۆی لە پێناو هەڵوێستی بوێر و پڕۆژەی نیشتمانی هەمەلایەنە بەخشی.

ئەوەشى روونکردەوە: بەرپرسیارێتی نیشتمانی و ئەخلاقی و پەروەردەیی وامان لێ دەکات، هەمیشە قوربانیدانی شەهیدان و زانایان و کەسایەتییە نەتەوەییە گەورەکان لەبیر و هزرماندا بێت و چیرۆکە قارەمانەکانیان وەک بەشێکی دانەبڕاو لە مێژوو و ناسنامەی وڵات بۆ نەوەکانی داهاتوو بگوازینەوە.

ئەوەشى راگەیاند: گەلەکەمان هەڵبژاردنی پەرلەمانی بە سەرکەوتوویی سازکرد، پابەندبوونی خۆی بە پرەنسیپە دیموکراسیەکان نیشاندا، ئێستا، رووبەڕووی بەربەستی چارەنووسساز دەبینەوە لە پێکهێنانی دەسەڵاتی یاسادانان و جێبەجێکردن کە بەڕاستی نوێنەرایەتی ئیرادەی گەلی عیراق دەکەن و هەوڵدەدەن بۆ بەدیهێنانی ویستەکانیان بۆ ژیانێکی شکۆمەندانە.

د. لەتیف رەشید، سەرۆککۆماری عیراق لە وتارەکەیدا راشیگەیاند: چەسپاندنی پرۆسەی دیموکراسی ئەرکێکی نیشتمانییە، لە ڕێگەی پابەندبوون بە بە دەستوورەوە بەدەست دێت. ئێمە داوای هەوڵی یەکگرتوو دەکەین بۆ پێکهێنانی حکومەتێک کە نوێنەرایەتی هەموو عێراقییەکان بکات و هیواکانیان بۆ عێراقێکی ئاوەدان و پێشکەوتوو بەدیبهێنێت- حکومەتێک کە توانای جێگیرکردنی ئاسایش و سەقامگیری و بەرەنگاربوونەوەی گەندەڵی و پەرەپێدانی ئاستی ژیان و کوالیتی خزمەتگوزارییەکان و پەرەپێدانی کەرتەکانی پەروەردە و تەندروستی و کەرتەکانی دیکەی هەبێت.

PUKMEDIA