پۆلیسی ئوسترالیا: ته‌قه‌كه‌ره‌كان باوك و كوڕن

news.rambler.ua

هێرشە چەکدارییەکەی ئوسترالیا

پۆلیسی ئوسترالیا رایگه‌یاند، ئه‌و چه‌كدارانه‌ی له‌ئاهه‌نگێكی جوله‌كه‌كاندا له‌ كه‌ناری بۆندی له‌ سیدنی 15 كه‌سیان كوشتووه‌، باوك و كوڕ‌ بوون، له‌كاتێكدا ئوسترالیا ماته‌مینی گشتی بۆ قوربانیانی رووداوه‌كه‌ راگه‌یاندوه‌ كه‌ نزیكه‌ی 30 ساڵه‌ له‌و وڵاته‌ رووداوی له‌وشێوه‌یه‌ رووینه‌داوه‌.

پۆلیس له‌كۆنگره‌یه‌كی ڕرۆژنامه‌وانیدا رایگه‌یاند، باوكه‌كه‌ ته‌مه‌ن 50 ساڵانه‌و له‌ شوێنی رووداوه‌كه‌ كوژراوه‌، به‌مه‌ش ژماره‌ی گیانله‌ده‌ستدان گه‌یشتووه‌ته‌ 16 كه‌س، كوڕ‌ه‌كه‌ش ته‌مه‌ن 24 ساڵانه‌ كه‌ تائێستاش به‌هۆی سه‌ختی برینه‌كه‌یه‌وه‌ باری ته‌ندروستی ناجێگیره‌و له‌نه‌خۆشخانه‌.

به‌پێی زانیاریی میدیاكانی ئه‌و وڵاته‌، له‌ ئه‌نجامی هێرشه‌كه‌دا بۆسه‌ر کەناری بۆندی له‌ سیدنی 15 كوژراو و ده‌یان كه‌سیش بریندار بوون، هه‌روه‌ها ته‌قه‌كه‌ری باوك ناوی ئه‌كره‌م-ه‌و كوڕه‌كه‌شی ناوی ناوید-ه‌، له‌گه‌ڵ ئه‌وه‌شدا به‌رپرسان ئه‌و ته‌قه‌كردنه‌یان به‌ هێرشێكی دژه‌ جووله‌كه‌ وه‌سفكردووه‌.

پۆلیسی ئه‌و وڵاته‌ ئاماژه‌ی به‌وه‌شكردووه‌، دوای هێرشه‌كه‌ 40 كه‌س له‌ نه‌خۆشخانه‌ ماون، كه‌له‌ناویاندا دوو ئه‌فسه‌ری پۆلیس كه‌ باری ته‌ندروستییان ناجێگیره‌ هه‌یه‌.

PUKMEDIA