سەرۆككۆمار: هەماهەنگیی نێوان عیراق و ئێران فاكتەری گرنگی روبەڕوبوونەوەی ئاڵنگارییەكانە

نووسینگەی راگەیاندنی سەرۆكایەتی كۆمار

كۆبوونەوەی سەرۆككۆمار لەگەڵ هاوتا ئێرانییەكەی

د.لەتیف جەمال رەشید، سەرۆككۆماری عیراق، ئەمڕۆ هەینی 12ی كانوونی یەكەمی 2025، لە شوێنی مانەوەی خۆی لە عەشق ئابادی پایتەختی توركمانستان، لەگەڵ مەسعود پزیشكیان، سەرۆككۆماری ئیسلامیی ئێران كۆبووەوە، ئەوەش لە چوارچێوەی كارەكانی "كۆڕبەندی گشتیی نێودەوڵەتی بۆ ئاشتی و متمانە"دا.

لە دیدارەكەدا گفتوگۆ كرا لەبارەی پەیوەندییە دووقۆڵییەكانی نێوان هەردوو وڵات و قووڵایی سیاسی و ستراتیژیی ئەو پەیوەندییانە، هەروەها جەختكرایەوە لەسەر پێویستیی برەودان بە پەیوەندییەكان و پەرەپێدانی میكانیزمەكانی هاریكاری بەجۆرێك كە لە بەرژەوەندیی هەردوو گەلی دراوسێدا بێت و هەردوو وڵات بتوانن بەشداریی كارا بكەن لە چەسپاندنی ئاسایش و سەقامگیریی ناوچەكەدا.

هەر لە دیدارەكەدا سەرۆككۆمار روونیكردەوە: كە هەماهەنگیی بەردەوام لە نێوان هەردوو وڵاتدا فاكتەرێكی گرنگە بۆ روبەڕوبوونەوەی ئاڵنگارییە هەرێمییەكان، هاوكات جەختی لەڕەتكردنەوەی رەهای عیراق كردەوە بۆ هەر جۆرە دەستدرێژی یان پێشێلكردنی سەروەریی نیشتمانیی وڵاتان.

هەروەها سەرۆككۆمار جەختی لە هەڵوێستی نەگۆڕی عیراق كردەوە لە پشتیوانیكردنی رێبازی ئاشتی و گفتوگۆ وەك باشترین بژاردە بۆ چارەسەركردنی پرسە هەڵپەسێردراوەكان و پاراستنی بەرژەوەندییە هاوبەشەكان، لەگەڵ پشتیوانیكردن لە هەر دەستپێشخەرییەكی هەرێمی یان نێودەوڵەتی كە سەقامگیریی ناوچەكە بەهێز بكات و رێگری لەوە بكات ناوچەكە بەرەو گرژیی زیاتر بڕوات.

لە بەشێكی دیكەی دیدارەكەدا، باس لە كۆمەڵێك دۆسیەی هەرێمی و نێودەوڵەتی و لە سەرووی هەموویانەوە دۆخی غەززە كرا، كە تێیدا دید و بۆچوونەكان هاوڕا بوون لەسەر پێویستیی پێدانی مافە رەواكانی گەلی فەڵەستین لە دامەزراندنی دەوڵەتی سەربەخۆی خۆیان، هەروەها پێویستە كۆمەڵگەی نێودەوڵەتی بەرپرسیارێتیی یاسایی و ئەخلاقیی خۆی لە ئەستۆ بگرێت بۆ كۆتاییهێنان بە مەینەتییەكانی ئەو گەلە.

PUKMEDIA