سەرۆکایەتی کۆمار:لایەنە پەیوەندیدارەکانی حکومەتی فیدراڵی هەماهەنگی لەگەڵ حکومەتی هەرێم بکەن

سەرۆکایەتی کۆمار

سەرۆکایەتی کۆماری عیراق

سەرۆکایەتی کۆمار لە راگەیەندراوێکیدا هاوسۆزی بۆ قوربانیانی لافاوەکەی ئەمڕۆ دەربری و داواشی لە لایەنە پەیوەندیدارەکانی حکومەتی فیدراڵی کرد کە دەستبەجێ هەماهەنگی لەگەڵ حکومەتی هەرێم بکەن بۆ پێشکەشکردنی پاڵپشتی و هاوکاری پێویست.

 لە راگەیەندراوەکەی سەرۆکایەتی کۆماردا هاتووە: ئێمە لە نزیکەوە چاودێری دۆخی گەلەکەمان دەکەین لە هەرێمی کوردستان دوای ئەو لافاو و بارانبارینە بەخوڕەی کە چەند ناوچەیەکی گرتەوە، بەداخەوە زیانی گیانی و برینداری لێکەوتەوە، هەروەها زیانی ماددی بەرچاوی لێکەوتەوە.

ئاماژەی بەوەشکردووە: وێڕای دەربڕینی دڵتەنگی قووڵی خۆمان بۆ ئەم ڕووداوە دڵتەزێنانە، هاوسۆزی تەواوی سەرۆکایەتی کۆمار دووپات دەکەینەوە لەگەڵ کەسوکاری قوربانیان و بریندارەکان، و لەگەڵ هەموو ئەو هاووڵاتیانەی کە زیانی ماددییان بەرکەوتووە.

لە کۆتایشدا، سەرۆکایەتی کۆمار داوا لە لایەنە پەیوەندیدارەکانی حکومەتی فیدراڵی دەکات کە دەستبەجێ هەماهەنگی لەگەڵ حکومەتی هەرێم بکەن بۆ پێشکەشکردنی پاڵپشتی و هاوکاری پێویست، هەروەها هەوڵەکانی فریاگوزاری خێراتر بکەن و هاوڵاتییان بپارێزن.

PUKMEDIA