پەیامنێرانی بێسنوور: ئەمساڵ 67 رۆژنامەنوس کوژراون

ئەنادۆڵ

کوژرانی رۆژنامەنوسان لە غەزە

 بەراورد بە ساڵی رابردوو، کوژرانی رۆژنامەنوسان لە سەرانسەری جیهان بەرزبووەتەوە و رێکخراوی پەیامنێرانی بێسنووریش ئاشکرای دەکات لە ئەمساڵدا 67 رۆژنامەنوس کوژراون.

 رێکخراوەکە بە ناونیشانی رۆژنامەنوسان نامرن، بەڵکو دەکوژرێن، ئاماری توندوتیژییەکانی دژ بە رۆژنامەنوسانی ئاشکرا کرد: لە ماوەی مانگی 12ی ساڵی 2024 تاوەکو مانگی 12ی2025، توندوتیژییەکان دژ بە رۆژنامەنوسان لەلایەن دامەزراوە رەسمی و ناڕەسمییەکان بەشێوەیەکی بەرچاو زیادیکردووە، بەشێوەیەک 67 رۆژنامەنوس کوژراون، کە زۆرترینی لە کەرتی غەزە بووە.

 لە بارەی پێشێلکارییەکانی دیکەش، رێکخراوەکە کە کار  بۆ بەرگری لە ئازادی رۆژنامەنوسان دەکات، ئاشکرای کردووە، لەئەمساڵدا 503 رۆژنامەنوس  لە 47 وڵاتی جیهاندا زیندانیکراون و 135 رۆژنامەنوسیش بۆ ماوەی 30 ساڵە بێسەروشوێنن، هەروەها 20 رۆژنامەنوسی دیکەش رفێندراون.

بەپێی ئاماری پەیامنێرانی  بێسنوور لە ساڵی 2023دا 49 رۆژنامەنوس کوژراون، لە ساڵی 2024دا ئامارەکە بۆ 66 رۆژنامەنوس و ساڵی 2025 یش 67 رۆژنامەنوس بەرزبووەتەوە، بەڵام رێکخراوی یونسکۆی سەر بە نەتەوەیەکگرتوەکان لە ماڵپەڕی رەسمی خۆی ئاشکرای کردووە، لە ساڵی 2025دا 91 رۆژنامەنوس کوژراون.

PUKMEDIA