قوباد تاڵەبانی: پێویستە کۆدەنگی لەنێوان لایەنەکان دروستبکرێت

نوسینگەی رۆژنامەوانی قوباد تاڵەبانی

قوباد تاڵەبانی و نوری مالیکی

وەفدی باڵای یەکێتیی نیشتمانیی کوردستان، بە سەرۆکایەتی قوباد تاڵەبانی لە بەغدا لەگەڵ نوری مالیکی سەرۆکی هاوپەیمانیی دەوڵەتی یاسا کۆبووەوە.

لە کۆبوونەوەکەدا کە رۆژی دووشەمە(8ی12ی2025) بەڕێوەچوو، باس لە هەوڵەکانی پێکهێنانی حکومەتی داهاتووی عیراق کرا و هەردوولا هاوڕابوون لەسەر پێویستیی دروستکردنی کۆدەنگی لەنێوان لایەنە سیاسییەکانی هەموو پێکهاتەکانی عێراق بۆ ئەوەی حکومەتێکی بەهێز و کارا پێکبهێنرێت کە جێی رەزامەندیی هەموو پێکهاتەکان بێت.

لەم چواەچێوەیەدا سەرۆکی هاوپەیمانیی دەوڵەتی یاسا رۆڵ و پێگەی سەرۆک مام جەلالی بیرهێنایەوە کە چۆن لەپێناو بەرژەوەندی گشتییدا ناوماڵی کورد و هەموو عێراقییەکانی رێکدەخستەوە و بە گرنگی زانی لەم قۆناغەشدا هەمان سیاسەتی سەرۆک مام جەلال جێبەجێ بکرێت بۆ دروستکردنی کۆدەنگی و پێکهێنانی حکومەتی داهاتوو.

لە کۆبوونەوەکەدا قوباد تاڵەبانی، ئامادەیی یەکێتیی نیشتمانیی کوردستانی دەربڕی بۆ هەموو جۆرە هاوکارییەک لەگەڵ لایەنە سیاسییەکان بۆ ئەوەی هەرچی زووتر رێککەوتنێکی تۆکمە و گشتگیر بکرێت لەسەر چۆنییەتی پێکهێنانی حکومەتی داهاتوو.

PUKMEDIA