رێژەی هەژاری لە عیراق کەمدەبێتەوە

AFP

دیمەنی بازاڕێکی بەسرە

وەزارەتی پلاندانانی عیراق ئاشکرای دەکات ڕێژەی هەژاری بەراورد بە ساڵانی ڕابردوو بۆ 6% دابەزیوە و ئامادەکاریشی بۆ دەستپێکردنی ستراتیژی کەمکردنەوەی هەژاری بۆ ساڵی 2026-2030 دەستپێکردووە.

عەبدولزەهرا ئەلهنداوی وتەبێژی وەزارەتی پلاندانانی عیراق رایگەیاند: رێژەی هەژاری لە عیراق لە ئەمساڵدا دابەزینی ڕوونی بەخۆیەوە بینیوە، هۆکارەکەشی بۆ زنجیرەیەک سیاسەت و ڕێوشوێنی حکومەت دەگەڕێتەوە کە بۆ رووبەڕووبونەوەی هەژاری دایناوە.

دەشڵێت: بەپێی دواین راپرسی کە وەزارەتی پلاندانان ئەنجامی داوە دەرکەوتووە رێژەی هەژاری بۆ 17%دابەزیوە، ئەمەش لەکاتێکدایە کە ساڵی 2022 رێژەکە 23% بووە.

وتەبێژەکەی وەزارەتی پلاندانان هۆکارێکی دیکەی دابەزینی رێژەی هەژاری بۆ دابینکردنی ئاسایشی خۆراک و فراوانکردنی چاودێری کۆمەڵایەتی گێڕایەوە، کە چین و توێژی زیاتر لەخۆدەگرێت.

ئاماژەی بەوەشکرد:سندوقی پاڵپشتیکردنی ناوچە هەژارەکان لە ساڵانی ڕابردوودا پڕۆژەی خزمەتگوزاریی لە ژمارەیەک پارێزگادا جێبەجێکردووە، جگە لە ڕۆڵی سندوقی گەشەپێدانی کۆمەڵایەتی سەر بە وەزارەتی پلاندانان، کە دەیان پڕۆژەی زیاتر لە 500 گوند لە سەرتاسەری عیراق جێبەجێکردووە، لەوانە دروستکردنی قوتابخانە و بنکەی تەندروستی، درێژکردنەوەی تۆڕەکانی ئاو و کارەبا، چاککردنی رێگاوبانەکان

پەیوەست بە پلانیان بۆ ساڵانی داهاتوو، عەبدولزەهرا ئەلهنداوی وتەبێژی وەزارەتی پلاندانانی عیراق ئاشکرای کرد: وەزارەتی پلاندانان بەردەوامە لە ئامادەکارییەکانی بۆ دەستپێکردنی ستراتیژی کەمکردنەوەی هەژاری بۆ ساڵانی 2026-2030، کە بەردەوام دەبێت لە گرتنەبەری ئەو هەنگاوانەی کە لە دوو ستراتیژی پێشوودا سەرکەوتوو بوون.

PUKMEDIA