دابه‌شكردنی مووچه‌ی مانگی ئه‌یلول راگه‌یه‌ندرا

PUKMEDIA

دابەشکردنی مووچە

وەزارەتی دارایی هەرێم، خشتەی مووچەی مانگی ئەیلولی فەرمانبەرانی هەرێمی كوردستانی راگەیاند و بەپێی خشتەكەش، رۆژی یەکشەممە دەست بەدابەشکردنی مووچە دەکرێت و ماوەی سێ رۆژ دەخایەنێت.

بەپێی راگەیەندراوێکی وەزارەتی دارایی و ئابوری هەرێمی کوردستان: ڕۆژی یەکشەممە30ی11ی2025، دەست بەدابەشکردنی مووچەی مانگی ئەیلوولی فەرمانبەران و مووچەخۆرانی هەرێمی کوردستان دەکرێت و ڕۆژی سێ شەممە 2ی12ی2025 کۆتایی بەدابەشکردنی مووچە دێت.
وەزارەتی دارایی لە راگەیەندراوەکەیدا داوای لە سەرجەم مووچەخۆران دەکات لەدوای سەعات یەکی دوانیوەرۆ سەردانی بانکەکان بکەن بەمەبەستی وەرگرتنی مووچەکانیان بە پێی خشتەی ڕاگەیەنراو.

ئەمەش لەکاتێکدایە، وه‌زاره‌تی دارایی و ئابوری هه‌رێم ڕ‌ۆژی 19ی11ی2025، داهاتی نانه‌وتی هه‌رێم بۆ مانگی ئه‌یلول كه‌ بڕ‌ه‌كه‌ی 120 ملیار دینار بوو به‌شێوه‌ی كاش خسته‌ سه‌ر هه‌ژماری بانكی وه‌زاره‌تی دارایی حكومه‌تی فیدراڵ له‌ لقی هه‌ولێری بانكی ناوه‌ندی عیراق، بۆیه‌ ئێستا حكومه‌ت و مووچه‌خۆران چاوه‌ڕ‌وانی ناردنی ته‌مویلی مووچه‌ی مانگی ئه‌یلولن، ئەمڕۆش 29ی11ی2025، بڕی 941 ملیار و 874 ملیۆن دینار وەک تەمویلی مووچەی مانگی ئەیلولی فەرمانبەران و مووچەخۆرانی هەرێمی کوردستان خرایە سەر هەژماری بانکی وەزارەتی دارایی و ئابووری هەرێمی کوردستان لەلقی هەولێری بانکی ناوەندی عیراق.

هاوکات رۆژی 27ی 10ی 2025، لەهەرێم دەست بەدابەشکردنی مووچەی مانگی ئاب کرا و بە سێ رۆژ مووچەی مووچەخۆرانی هەرێمی کوردستان دابەشکرا.

PUKMEDIA


خشتەی مووچەی مانگی ئەیلول