دارایی باس لەراگرتنی مووچە دەکات و خانەنشینی سلێمانیش دەڵێت: راناگیرێت

کوردستان 10:19 AM - 2025-11-20

وەزارەتی دارایی باس لە راگرتنی مووچەی مانگی ئەیلولی ئەو خانەنشینانە دەکات کە هەژماری من-یان پڕنەکردۆتەوەو سەرچاوەیەک لە بەڕێوەبەرایەتى گشتى خانەنشینى سلێمانیش رایدەگەیەنێت: مووچەى ئەیلول و تشرینى یەکەمى هیچ خانەنشینێک لە هەرێمى کوردستان بەهۆى نەبوونى هەژمارى منەوە ڕاناگیرێت.

وەزارەتی دارایی: مووچەکانیان رادەگیرێت

بەڕێوبەرایەتی گشتی خانەنشینی لە وەزارەتی دارایی و ئابوری حکومەتى هەرێمى کوردستان رایگەیاندوە: ئەو خانەنشین و وارسانەی کە تاوەکو ئێستا فۆڕمی هەژماری منیان پڕ نەکردۆتەوە، لە کاتی دابەشکردنی مووچەی مانگی ئەیلوول ، مووچەکانیان ڕادەگیرێت تاوەکو ئەو کاتەی فۆڕمی هەژماری من پڕ دەکەنەوە.

هاوکات ئاماژە بەوەشدەکات بەگوێرەى بڕیاری وەزارەتی دارایی حکومەتی فیدراڵ، هەر فەرمانبەرو خانەنشین و مووچەخۆرێکی هەرێمی کوردستان تاوەکو کۆتایی ئەمساڵ هەژماری بانکی نەبێت و خۆی لەپرۆژەی هەژماری من تۆمار نەکردبێت، لە بەغدادەوە مووچەکەی رادەگیرێت و لەهەرێمى کوردستان خەرج ناکرێت، جەختلەوەشدەکاتەوە، لەدوای سەری ساڵیشەوە دابەشکردنی مووچە بەشێوەی کاش نامێنێت.

خانەنشینی سلێمانی: مووچەکانیان راناگیرێت

ئەمەش لەکاتێکدایە لەلایەکی ترەوە بەڕێوەبەرایەتى گشتى خانەنشینى سلێمانى رایگەیاند: مووچەى مانگەکانى ئەیلول و تشرینى یەکەمى هیچ خانەنشینێک لە هەرێمى کوردستان بەهۆى نەبوونى هەژمارى منەوە راناگیرێت، بەڵکو ئەوە فشارێکە لەلایەن هەولێرەوە بەکاردەهێنرێت لەسەر ئەو مووچەخۆرانەى هەژمارى منیان نییە.

راشیگەیاند، ژمارەى ئەو خانەنشینانەى لە سلێمانى هەژمارى منیان هەیە و لەو رێگەیەوە مووچە وەردەگرن، لە 50 بۆ 60 کەس تێپەڕناکات، ئەوانەش لە سلێمانى تەمویلى مووچەکانیان ناکرێت بەڵکو لە هەولێرەوە دەکرێت و ئەوەش گرفتى بۆ ئەوان دروستکردووە.

PUKMEDIA