سكرتێری ئه‌نجومه‌نی وه‌زیران: هه‌رێم له‌ 71% ی مووچه‌ دابین ده‌كات

PUKMEDIA

ئامانج رەحیم سكرتێری ئەنجومەنی وەزیرانی هەرێم

سكرتێری ئه‌نجومه‌نی وه‌زیرانی هه‌رێم رایده‌گه‌یه‌نێت: هه‌رێم به‌ داهاتی خۆی به‌ڕ‌ێژه‌ی 71% تێچووی مووچه‌ی مانگانه‌ دابین ده‌كات، به‌وپێیه‌ش تێچووی مووچه‌ی مانگانه‌ی هه‌رێم له‌سه‌ر حكومه‌تی فیدراڵی به‌ڕ‌ێژه‌ی 29%ه‌.

د. ئامانج ره‌حیم سكرتێری ئه‌نجومه‌نی وه‌زیرانی هه‌رێم رایگه‌یاندوه‌: له‌ دوای جێبه‌جێكردنی رێكه‌وتننامه‌ی سێقۆڵی هه‌نارده‌ی نه‌وتی هه‌رێم، له‌ئێستادا هه‌رێم به‌ داهاتی نه‌وت و نانه‌وتی خۆی مانگانه‌ بڕ‌ی 665 ملیار دینار به‌ كاش ده‌خاته‌ سه‌ر حسابی وه‌زاره‌تی دارایی عیراقی فیدڕ‌اڵ، به‌م شێوه‌یه‌ش هه‌رێم به‌ داهاتی خۆی به‌ ڕ‌ێژه‌ی 71% ی تێچووی مووچه‌ی مانگانه‌ دابین ده‌كات.

راشیگه‌یاند: به‌پێی دوا لێدوانی ئه‌مڕ‌ۆی به‌ڕ‌ێوه‌به‌ری گشتی نه‌وتی باكور بڕ‌ی 200 هه‌زار به‌رمیل نه‌وتی رۆژانه‌ی هه‌رێم له‌ لایه‌ن كۆمپانیای سۆمۆ وه‌ ده‌فرۆشرێت، كه‌ داهاتی كاشی مانگانه‌ی فرۆشتنی ئه‌م بڕ‌ه‌ نه‌وته‌ (به‌ نرخی ئه‌مڕ‌ۆی نه‌وتی برێنت 64.79 دۆلار) كه‌ ده‌كاته‌ (545 ملیار) دیناری مانگانه‌ و داهاته‌كه‌ی هه‌مووی بۆ وه‌زاره‌تی دارایی فیدڕ‌اڵه‌.

د.ئامانج ره‌حیم ئاماژه‌ی به‌وه‌شكرد: له‌گه‌ڵ ئه‌وه‌شدا بڕ‌ی 120 ملیار دیناری دیكه‌ی مانگانه‌ وه‌ك به‌شی گه‌نجینه‌ی فیدڕ‌اڵیی له‌داهاتی نانه‌وتی هه‌رێم به‌كاش ده‌خرێته‌ سه‌ر حسابی وه‌زاره‌تی دارایی عیراق، له‌كاتێكدا خه‌رجی مووچه‌ی مانگانه‌ی هه‌رێم له‌سه‌ر وه‌زاره‌تی دارایی فیدڕ‌اڵ 945 ملیار دیناره‌و به‌لێده‌ركردنی داهاتی نه‌وت و نانه‌وتی هه‌رێم كه‌ به‌ كاش مانگانه‌ ده‌چێته‌ سه‌ر حسابی دارایی فیدڕ‌اڵ له‌كۆی گشتی تێچووی مووچه‌ی هه‌رێم، له‌ئه‌نجامدا تێچووی مووچه‌ی مانگانه‌ی هه‌رێم له‌سه‌ر حكومه‌تی فیدڕ‌اڵی له‌ئێستادا ته‌نها (280 ملیار) دیناری پێویسته‌ كه‌ به‌ ڕ‌ێژه‌ ده‌كاته‌ 29%ی مووچه‌ی مانگانه‌.

هاوكات د. ئامانج ره‌حیم سكرتێری ئه‌نجومه‌نی وه‌زیرانی هه‌رێم له‌تێبینییه‌كدا روونیكردووه‌ته‌وه‌، هه‌رچه‌نده‌ له‌سیستمی ژمێریاریی حكومی خه‌رجی به‌جیا له‌داهات ئه‌ژمار ده‌كرێت، به‌ڵام ئه‌گه‌ر تێچووی به‌رهه‌مهێنان و گواستنه‌وه‌ش حساب بكه‌ین كه‌ 16$ ه‌ بۆ یه‌ك به‌رمیل، ئه‌و كات تێچووی مووچه‌ی مانگانه‌ی هه‌رێم به‌ تێچووی نه‌وتیشه‌وه‌ ته‌نها نزیكه‌ی 400 ملیار له‌سه‌ر حكومه‌تی فیدڕ‌اڵی ده‌كه‌وێت، كه‌ ده‌كاته‌ رێژه‌ی 40% ی مووچه‌ی مانگانه‌و ئه‌و كاتیش هه‌رێم خۆی رێژه‌ی  60% ی مووچه‌ی خۆی له‌داهاتی كاشی خۆی دابینكردووه‌.

PUKMEDIA