داهاتی نانه‌وتی مانگی ئه‌یلول خرایه‌ سه‌ر هه‌ژماری دارایی عیراق

PUKMEDIA

دراوی عیراقی

به‌شی گه‌نجینه‌ی فیدراڵی له‌داهاتی نانه‌وتی هه‌رێم بۆ مانگی ئه‌یلول خرایه‌ سه‌ر هه‌ژماری بانكی وه‌زاره‌تی دارایی فیدراڵ.

له‌ڕ‌اگه‌یه‌نراویكدا وه‌زاره‌تی دارایی و ئابووری هه‌رێمی كوردستان رایگه‌یاندوه‌: ئه‌مڕ‌ۆ 19 ی تشرینی دووه‌می 2025 به‌شی گه‌نجینه‌ی فیدراڵی له‌داهاتی نانه‌وتی هه‌رێم بۆ مانگی ئه‌یلولی ساڵی ( 2025 ) كه‌ بڕ‌ه‌كه‌ی (120،000،000،000 ) سه‌دو بیست ملیار دیناره‌، به‌شێوه‌ی كاش خرایه‌ سه‌ر هه‌ژماری بانكی وه‌زاره‌تی دارایی حكومه‌تی فیدراڵ له‌لقی هه‌ولێری بانكی ناوه‌ندی عیراق. 

هاوكات رۆژی 18ی 11ی 2025 وه‌زاره‌تی دارایی و ئابوری هه‌رێم راپۆرتی ته‌رازووی پێداچوونه‌وه‌ی خه‌رجی و داهاته‌كانی مانگی ئه‌یلوولی هه‌رێمی كوردستانی بۆ وه‌زاره‌تی دارایی حكومه‌تی فیدراڵ نارد.

له‌باره‌ی ناردنی مووچه‌ی مانگی ئه‌یلولیشه‌وه‌ وه‌زیری دارایی عیراق رایگه‌یاندوه‌:" دوای ناردنی داهاتی نانه‌وتی و راپۆرتی ته‌رازووی پێداچوونه‌وه‌ی خه‌رجی و داهاته‌كانی مانگی ئه‌یلوول، راسته‌وخۆ مووچه‌ بۆ هه‌رێم ده‌نێردرێت"، بۆیه‌ چاوه‌ڕ‌وانده‌كرێت هه‌فته‌ی داهاتوو ته‌مویلی مووچه‌ی مانگی ئه‌یلول بخرێته‌سه‌ر هه‌ژماری بانكی وه‌زاره‌تی دارایی هه‌رێم و دوای بڵاوكردنه‌وه‌ی خشته‌ی مووچه‌ ده‌ست به‌دابه‌شكردنی مووچه‌ی مووچه‌خۆرانی هه‌رێم بۆ مانگی 9 بكرێت.

ئه‌مه‌ش له‌كاتێكدایه‌، له‌هه‌فته‌ی داهاتووه‌وه‌ دابه‌شكردنی مووچه‌ی مانگی 11 له‌عیراق ده‌ستپێده‌كات، به‌ڵام له‌هه‌رێم چاوه‌ڕ‌وانییه‌كان بۆ مووچه‌ی مانگی 9 یه‌، به‌و پێیه‌ش تائێستا مووچه‌ی دوو مانگی مووچه‌خۆرانی هه‌رێم به‌نادیاریی ماوه‌ته‌وه‌.

PUKMEDIA