ئەنجومەنی ئاسایش پلانی ئاشتی ئەمریکای بۆ غەزە پەسەند کرد

AFP

ئەنجومەنی ئاسایشی نێودەوڵەتی

ئەنجومەنی ئاسایشی نێودەوڵەتی سەر بە نەتەوەیەکگرتووەکان پلانی ئاشتی دۆناڵد ترەمپ سەرۆکی ئەمریکای پەسەند کرد کە پڕۆژەیەکی 20 خاڵییە و تایبەتە بە کۆتایی هاتنی جەنگ لە غەزە و دروستکردنی دەوڵەتی فەڵەستین لە داهاتوودا.

پرۆژەکە بریتی یە لە بڵاوەپێکردنی هێزی نێودەوڵەتی لە غەزە و چەکداماڵینی گروپە چەکدارەکان، هەروەها دانانی نەخشەڕێگای دروستکردنی دەوڵەتی فەڵەستین لە داهاتوودا، ئەمە جگە لەوەی وڵاتانی جیهان بەشدار دەبن لە ئاوەدانکردنەوەی کەرتی غەزە.

 پرۆژە یاساکە بە دەنگی 13 ئەندامی ئەنجومەنی ئاسایش تێپەڕێندرا و مایک وەڵتز باڵیۆزی ئەمریکا لە نەتەوەیەکگرتووەکان پڕۆژە یاساکەی بە" مێژوویی و بنیاتنەرانە" ناوزەند کرد، هاوکات روسیا و چین دژی بڕیارەکە وەستانەوە و دەنگیان پێنەدە، بەڵام مافی ڤیتۆیان لەدژی بەکارنەهێنا.

پەیوەست بە کاردانەوەی ناوخۆی فەڵەستین دوای بڕیارەکە، بزووتنەوەی حەماس بڕیارەکەی رەتکردەوە و لە بەیاننامەیەکدا رایگەیاند: کە چەک دانانێن، هەروەها شەڕی لە دژی ئیسرائیل بە رەوا ناوبرد، بەڵام دەسەڵاتدارێتی فەڵەستین کە بزووتنەوەی فەتح بەڕێوەی دەبات، ئامادەیی خۆی نیشاندا بەشداری لە جێبەجێکردنی بڕیارەکەدا بکات و هۆکارەکەشی بۆ ئەوە گێڕایەوە کە دەیەوێت" کۆتایی بە ئازار و نەهامەتی فەڵەستینییەکان بهێنێت".

PUKMEDIA