قوباد تاڵەبانی: دەمانەوێت گاز لەبەرژەوەندی خەڵک بەکاربهێنرێت

راگەیاندنی قوباد تاڵەبانی

قوباد تاڵەبانی لەگەڵ وەفدێکی ئەنجومەنی بازرگانیی ئەمریکا – کوردستان

قوباد تاڵەبانی، جێگری سەرۆکوەزیران پێشوازیکرد لە وەفدێکی ئەنجومەنی بازرگانیی ئەمریکا – کوردستان بە سەرۆکایەتی دەیڤد تەفوری، سەرۆکی ئەنجومەنەکە و پێکەوە تاوتوێی چەند پرسێکی جێی بایەخی هەردوولایان کرد.

لە کۆبوونەوەکەدا کە رۆژی دووشەمە(17/11/2025) لە هەولێر بەڕێوەچوو، گفتوگۆکرا لەبارەی چۆنییەتی پەرەپێدانی پەیوەندییە بازرگانییەکانی نێوان ئەمریکا و هەرێمی کوردستان.

قوباد تاڵەبانی بە ئاماژەدان بە پرۆسەی گەشەپێدانی ئابوری هەرێم رایگەیاند: هەرێمی کوردستان خوازیارە کۆمپانیا ئەمریکییەکان بەشدارییەکی گەورەتر و کاریگەرتریان هەبێت لەم پرۆسەیەدا و حکومەتی هەرێمیش ئامادەیە هەموو جۆرە هاوکارییەک و کارئاسانییەکیان پێشکەش بکات.

لە تەوەرێکی دیکەدا باس لە پرسی نەوت و گاز کرا. لەم چوارچێوەیەشدا جێگری سەرۆکوەزیران روونیکردەوە کە ئێمە لەگەڵ ئەوەداین لەم خولەی ئەنجومەنی نوێنەرانی عیراقدا پەلە بکرێت لە پەسندکردنی یاسای نەوت و گاز بە جۆرێک کە یاساکە کێشەکانی نێوان هەرێم و بەغدا یەکلابکاتەوە و بەپێی دەستور دەسەڵاتەکان و تایبەتمەندییەکانی هەرێمی کوردستان لەبەرچاو بگرێت.

قوباد تاڵەبانی جەختیشی کردەوە ئەولەوییەتی ئێمە لەوەدایە کە گاز لە خزمەتی خەڵك و بۆ گەشەپێدانی ژێرخانی پیشەسازی و ئابوری کوردستان بەکاربهێنرێت.

PUKMEDIA