مووچه‌خۆرانی هه‌رێم مه‌ترسی دووباره‌بوونه‌وه‌ی سیناریۆكانی ساڵی رابردوویان هه‌یه‌

PUKMEDIA

پارەی عیراقی

مانگێك و 10رۆژ ماوه‌ بۆ داخستنی ساڵی دارایی عیراق و چاره‌نووسی چوار مووچه‌ی فه‌رمانبه‌رانی هه‌رێم نادیاره‌، هێشتا مووچه‌ی مانگی 9 نه‌نێردراوه‌و مووچه‌كانی مانگی یانزه‌ و دوانزه‌ش نادیاره‌و پێویستی به‌ رێككه‌وتنی سیاسی هه‌یه‌.

وابڕیاره‌ لەم هەفتەیەدا ئه‌نجومه‌نی وه‌زیرانی عیراق كۆببێته‌وه‌و بڕ‌یار له‌سه‌ر خه‌رجكردنی مووچه‌ی مانگی 9ی فه‌رمانبه‌رانی هه‌رێم بدات.

به‌پێی زانیارییه‌كان كێشه‌ سه‌ره‌كیه‌كه‌ له‌مووچه‌ی مانگه‌كانی 11و 12دایه‌، به‌پێی یاسا له‌ 25ی كانوونی یه‌كه‌می هه‌موو ساڵێك سه‌رجه‌م خه‌رجییه‌كانی حكومه‌تی عیراقی فیدڕ‌اڵ راده‌گیرێن و دوای ئه‌و كاته‌ ناتواندرێت هیچ خه‌رجییه‌كی ساڵی 2025 ئه‌نجام بدرێت.

هه‌ربه‌پێی زانیارییه‌كان حكومه‌تی هه‌رێم له‌ هه‌وڵی رێككه‌وتنی سیاسییه‌ له‌گه‌ڵ حكومه‌تی عیراق كه‌ پێش داخستنی حیساباتی كۆتایی ساڵ بڕ‌یاری خه‌رجكردنی ئه‌و دوو مووچه‌یه‌ ده‌ربكرێت، ئه‌گه‌ر خه‌رجكردنیشی بكه‌وێته‌ ساڵی داهاتوو.

فه‌رمانبه‌ر و مووچه‌خۆرانی هه‌رێم مه‌ترسی ئه‌وه‌یان هه‌یه‌ هه‌مان سیناریۆی ساڵی پار دووباره‌ ببێته‌وه‌، كاتێك ساڵی پار مووچه‌ی مانگی 11 له‌ 17ی كانوونی یه‌كه‌مدا نێردرا، به‌ڵام مووچه‌ی مانگی 12 نه‌دراو تا ئێستاش چاره‌نووسی به‌ نادیاری ماوه‌ته‌وه‌.

PUKMEDIA