سەرۆککۆمار: رێڕەوی دیموکراسی بە ئیرادەی نیشتمانیی بەردەوام بێت

نوسینگەی راگەیاندنی سەرۆکایەتی کۆمار

سەرۆککۆمار لە کۆمسیۆنی باڵای سەربەخۆی هەڵبژاردنەکان

ئەمڕۆ 8ی11ی2025، د. لەتیف جەمال ڕەشید سەرۆککۆماری عیراق، سەردانی بارەگای کۆمسیۆنی باڵای سەربەخۆی هەڵبژاردنەکانی کرد بۆ ئاگاداربوون لە دوایین ئامادەکارییەکانی کۆمسیۆن بۆ ڕۆژی دەنگدان و رایگەیاند: ڕێڕەوی دیموکراسی لە عیراقدا دەبێت بە ئیرادەیەکی نیشتمانیی ڕاستگۆیانە بەردەوام بێت.

لە میانی سەردانەکەیدا، سەرۆککۆمار چاوی بە سەرۆکی ئەنجومەنی کۆمسیاران لە کۆمسیۆنی باڵای سەربەخۆی هەڵبژاردنەکان، دادوەر عومەر ئەحمەد محەمەد و ئەندامانی ئەنجومەن کەوت کە نوێنەری سکرتێری گشتی نەتەوەیەکگرتووەکان لە عیراق، محەمەد حەسان ئامادەبوو.

لە سەردانەکەدا ڕوونیکردەوە کە ڕێڕەوی دیموکراسی لە عیراقدا دەبێت بە ئیرادەیەکی نیشتمانیی ڕاستگۆیانە بەردەوام بێت بۆ گەیشتن بە هیوا و ئاواتەکانی گەلەکەمان لە ڕێگەی هەڵبژاردنێکی پاک و شەفافەوە کە ئیرادەی ڕاستەقینەی دەنگدەر ڕەنگبداتەوە،بۆیە داوای لە عیراقییەکان کرد بەشدارییەکی بەرفراوان لە هەڵبژاردنەکاندا بکەن و مافی دەستووریی خۆیان بەکاربهێنن.

هاوکات محەمەد حەسان، نوێنەری سکرتێری گشتی نەتەوەیەکگرتووەکان لە عیراق، ستایشی سەردانەکەی سەرۆککۆماری بۆ کۆمسیۆنی باڵای سەربەخۆی هەڵبژاردنەکان کرد و ئاماژەی بەوەدا کە چاوی جیهان لە یازدەی تشرینی دووەمدا لەسەر عیراق دەبێت، لە ڕۆژێکدا کە وێستگەیەکی گرنگە لە مێژوو و داهاتووی عیراقدا.

لەلایەکی دیکەوە، سەرۆکی ئەنجومەنی کۆمسیاران جەختی کردەوە کە سەردانەکەی سەرۆککۆمار مایەی شەرەفێکی گەورەیە بۆ کۆمسیۆن،هەروەها شیکردنەوەیەکی وردی لەسەر ئامادەیی کۆمسیۆن بۆ ڕۆژی دەنگدان و هەوڵە بەردەوامەکان بۆ دابینکردنی ژینگەیەکی هەڵبژاردنی گونجاو کە سەرکەوتنی ئەم پڕۆسە دیموکراسییە مسۆگەر بکات، پێشکەش کرد.

 لە کۆتایشدا،سەرۆککۆمار ئاگاداری ئەنجامدانی تاقیکردنەوەیەکی تەواوی پڕۆسەی دەنگدان بوو، کە نمایشێکی وردی سەرجەم قۆناغەکانی پڕۆسەی هەڵبژاردنی لەخۆگرتبوو.

PUKMEDIA