پەردە لەسەر گەورەترین پەیکەری سەرۆک مام جەلال لە کەرکوک لادرا

PUKMEDIA

پەیکەری سەرۆک مام جەلال

ئەمڕۆ5ی11ی2025 بە ئامادەبوونی شاناز ئیبراهیم ئەحمەد خانمی یەکەم و ئاسۆ مامەند و رێبوار تەها و د. محەمەد سابیر، پەردە لەسەر گەورەترین پەیکەری سەرۆک مام جەلال لەپارکێکی دەروازەی شار  لە کەرکوک لادرا  و هەمووانیش دووپاتیان کردەوە کە سەرۆک مام جەلال خۆشەویستی تەواوی پێکهاتەکانی کەرکوک بوو.

سەرۆک مام جەلال خۆشەویستی تەواوی پێکهاتەکانی کەرکوکە

لەسەرەتای رێوڕەسمەکەدا، ئاسۆ مامەند ئەندامی مەکتەبی سیاسی و سەرپەرشتیاری کەرکوک-سەڵاحەدینی یەکێتیی نیشتمانیی کوردستان، لە وتارێکیدا رایگەیاند: سەرەڕای ئەوەی سەرۆک مام جەلال  سەرقاڵ بوو، بەڵام بەردەوام دەهاتە کەرکوک و لەگەڵ هەموو پێکهاتەکان کۆدەبوویەوە، بۆیە تەنها یەکێتی و کورد سەرۆک مام جەلالیان خۆشناوێت،بەڵکو تەواوی پێکهاتەکان سەرۆک مام جەلالیان خۆشدەوێت.

دووپاتیشی کردەوە: ئەگەر بمانەوێت روحی سەرۆک مام جەلال شاد بکەین، پێویستە خزمەتی زیاتری کەرکوک بکەین.

 لە بارەی سیاسەتی یەکێتیش بۆ شاری کەرکوک، ئاسۆ مامەند ئاماژەی بەوەکرد: بەدڵنیاییەوە یەکێتیی نیشتمانیی کوردستان بەسەرۆکایەتی سەرۆک بافڵ بەهەمان رێبازی سەرۆک مام جەلال کار دەکات،چونکە کەرکوک شاری پێکەوە ژیان و خۆشەویستییە.

وتیشی: کەرکوکییەکان شایستەی ئەوەن خزمەتی زیاتر بکرێن و شایستەی ئەوەیە لە هەموو شارەکانی عیراق و هەرێمی کوردستانەوە، خەڵک حەز بکات بێتە کەرکوک و لێرە دابنیشێت.
ئاسۆ مامەند دووپاتیشی کردەوە: کەرکوکییەکان زۆر بەوەفابوون بۆ رێبازەکەی سەرۆک مام جەلال، ئێمەش بەڵێن دەدەین لەسەر رێبازەکەی بەردەوام دەبین و خزمەت دەکەین.

سەرۆک مام جەلال ژیانی خۆی بۆ خزمەت تەرخان کردبوو

هاوکات، د. محەمەد سابیر سەرۆکی دامەزراوەی سەرۆک جەلال تاڵەبانی لە وتارێکیدا رایگەیاند: ئەم بۆنەیە دەرفەتێکی بێوێنایە بۆ نیشاندانی ئەو خۆشەویستە قوڵەی کە کەرکوکییەکان بۆ ئەو رابەرە مەزنە هەیانە، کە ژیانی خۆی بۆ خزمەت تەرخانکردبوو.

ئاماژەی بەوەشکرد: رێگایەک نییە بۆ بنیاتنانی نیشتمان،  جگە لە خۆشەویستی و پێکەوە ژیان کە سەرۆک مام جەلال دایڕشتووە.

  سەرۆک مام جەلال کەرکوکی بە نموونەیەکی زیندووی  یەکڕیزی و پێکەوە ژیانی هاوبەش دەبینی

هەر لەو رێوڕسمەدا، رێبوار تەها پارێزگاری کەرکوک و سەرۆکی لیستی222ی یەکێتی لە کەرکوک رایگەیاند:  پەیکەر تەنها بەردێکی داتاشراو نییە، بەڵکو سیمبولێکە بۆ وەفاداری و  یادگایەکی هەمیشەییە  بۆ سەرکردەیەک کە تەمەنی خۆی بۆ خزمەتی وڵاتەکەی تەرخان کرد.

راشیگەیاند: سەرۆک مام جەلال کەرکوکی بە پێکهاتە ئاینی و نەتەوەییەکەیەوە خۆشدەویست، ئەم شارەی بە نموونەیەکی زیندووی  یەکڕیزی و پێکەوە ژیانی هاوبەش دەبینی، بەو پەڕی دڵسۆزییەوە هەوڵیدەدا کە کەرکوک وەک سیمبولێکی برایەتی  لە نێوان کورد و عەرەب و تورکمان و کلد و ئاشورییەکان  بمێنێتەوە.

لە بارەی پرۆژەکەشەوە رایگەیاند: پرۆژەکە لەسەر ئەرکی حکومەتی خۆجێی کەرکوک دروستکراوە.

لە کۆتایشدا رێبوار تەها ئاماژەی بەوەکرد: هەرچییەک بکەین هەرچۆنێک کار و خزمەت  بکەین، هەرگیز ناتوانین بگەین بە وەفای سەرۆک مام جەلال بۆ کەرکوک، بۆیە بەوپەری شانازییەوە رێبازی سەرۆک مام جەلال پەیڕەو دەکەین، چونکە رێبازی خزمەتکردنە.

PUKMEDIA