حکومەتى عیراق بۆ ناردنى مووچە چاوەڕێى داهاتى نانەوتى هەرێمە

PUKMEDIA

دینارى عیراقى و لۆگۆى حکومەتى هەرێم و عیراق

حکومەتى عیراق بۆ ناردنى مووچەى مانگى ئاب چاوەڕوانى ناردنى داهاتى نانەوتى هەرێمە، کە بڕەکەى 120ملیار دینارە و ئەندامێکى لیژنەى دارایى لە ئەنجومەنى نوێنەرانى عیراق دەڵێت: بە ناردنى داهاتى نانەوتى مانگى ئاب، راستەوخۆ حکومەتى عیراق مووچەى ئەو مانگە بۆ هەرێم دەنێرێت، چونکە سەرۆکوەزیرانى عیراق رەزامەندى لەسەر خەرجکردنى مووچەى مانگى ئابى مووچەخۆرانى هەرێم داوە.

نەرمین مەعروف ئەندامى لیژنەى دارایى ئەنجومەنى نوێنەرانى عیراق بە PUKMEDIA  راگەیاند: ئەگەر حکومەتى هەرێم بڕى 120 ملیار دینار وەک داهاتى نانەوتى لە مانگى ئاب بخاتەسەر هەژمارى وەزارەتى دارایى عیراق، وەزارەتى دارایى عیراق راستەوخۆ مووچەى مانگى ئاب بۆ هەرێم دەنێرێت.

باسى لەوەشکرد: لەگەڵ ئەوەى حکومەتى هەرێم پابەندییەکانى خۆى بەرامبەر بە حکومەتى عیراق بە پێى ئەو رێکەوتنەى لە نێوان هەردوولادا هەیە، جێبەجێ کردووە، بەڵام گرنگە هەتا رێکەوتنى نوێ لەسەر داهاتى نانەوتى هەرێم دەکرێت، مانگانە حکومەتى هەرێم بڕى 120 ملیار دینار وەک داهاتى نانەوتى بۆ عیراق بنێرێت، بۆ ئەوەى عیراقیش مووچەى مووچەخۆرانى هەرێم بنێرێت.

نەرمین مەعروف، ئەوەشى خستەڕوو: بە پێى ئەو رێککەوتنەى لە نێوان هەردوولادا هەیە، هیچ مووچەیەکى ئەمساڵى مووچەخۆرانى هەرێم نابێت بفەوتێت، بەڵام تەئکید دەکەمەوە کە پێویستە حکومەتى هەرێم مانگانە داهاتى نانەوتى بۆ عیراق بنێرێت، کە بۆ مانگى ئاب 120 ملیار دینارە و بۆ مانگەکانى دیکەش پێویستە رێکەوتنى نوێ ئەنجامبدرێت.

بە پێى زانیارییەکانى PUKMEDIA  چاوەڕوان دەکرێت، سبەینێ یەکشەممە 19ى 10ى2025 حکومەتى هەرێم بڕى 120 ملیار دینار، وەک داهاتى نانەوتى مانگى ئاب بخاتە سەر هەژمارى وەزارەتى دارایى عیراق، لەم هەفتەیەشدا حکومەتى عیراق مووچەى مانگى ئاب بۆ مووچەخۆرانى هەرێم بنێرێت.


PUKMEDIA