روانگەی سوری: لە شەڕو پێکدادانەکانی سوەیدا 42 کەس کوژراون

روانگەی سوری

هێزە ئەمنییەکان بەرەو سوەیدا جوڵە دەکەن

شەڕو پێکدادانی نێوان دروزەکان و  هێزەکانی حکومەتی دیمەشق لە پارێزگای سوەیدا بەردەوامە و روانگەی سوریش ئاشکرای دەکات:" لانیکەم تاوەکو ئێستا 42 کەس کوژراون و  120 کەسی دیکەش برینداربوون".

 روانگەی سوری بۆ مافەکانی مرۆڤ بڵاویکردەوە:" بەهۆی پێکدادانی نێوان دروز لەگەڵ بەد و هێزە ئەمنییەکان لە پارێزگای سوەیدا لە باشوری سوریا، تاوەکو ئێستا لانیکەم42 کەس کوژراون و  120 کەسی دیکەش برینداربوون".

راشیگەیاند:" لە نێو کوژراوەکاندا پێنج چەکدار هەیە کە ناسنامەیان دیار نیە و نازانرێت سەر بە وەزارەتی بەرگرین یان نا".

بەمەش کۆی قوربانییەکان لە ماوەی 48 سەعاتی رابردوودا گەیشتە64 کوژراو،کە 48 کوژراو لە دروزەکانی سوەیدان دوو منداڵ و ژنێکیان تێدایە،هەروەها 10کوژراوی دیکەش لە دەشتەکی (بەدەوی)ییەکان، هەروەها 6 کوژراویش لە هێزەکانی سەر بە وەزارەتی ناوخۆ و بەرگریین، ئەمە جگە لەوەی دەیان کەسی دیکە بریندار کە ژن و منداڵیان تێدایە.

لەلایەکی دیکەوە مستەفا بەکور پارێزگاری سوەیدا داوای لە هەموو لایەک کرد:" دان بەخۆیاندا بگرن و کار بۆ چەسپاندنی سەقامگیری و چاکسازی بکەن".
پارێزگاری سوەیدا راشیگەیاند:" حکومەت بەرپرسیارە لە پاراستنی هاووڵاتییان و گێڕانەوەی مافە زەوتکراوەکانیان".

پارێزگای سوەیدا گەورەترین مەڵبەندی پێکهاتەی ئاینیی دروزەکانە، کە ژمارەیان نزیکەی 700 هەزار کەس دەبێت.

هاوکات، ئەنجومەنی سوریای دیموکرات لە راگەیەندراوێکیدا سەرکۆنەی رووداوەکانی سوەیدای کرد و رایگەیاند:" بەشداری هێزە ئەمنییەکان لە ململانێ ناوخۆییەکان دەبێتە هۆی زیادبوونی ئاڵۆزییەکان، هەروەها ئەم مامەڵە کردنە مەترسیدارە و هاوتەریب نیە لەگەڵ هیچ حکومەتێک کە هەست بە بەرپرسیارێتی بکات".

راشیگەیاند:" رووداوەکانی سوەیدا هۆکارەکەی هەرچییەک بێت، نابێت لە  قەیرانە گشتییەکانی سوریا جیابکرێتەوە".

PUKMEDIA