پەرلەمانتارێک: دابەشکردنی مووچە پێش جەژن تەنها دەنگۆیە

PUKMEDIA

دراوی عیراقی

دابەشکردنی مووچەی مووچەخۆرانی هەرێم، پێش جەژنی رەمەزانی پیرۆز، تەنها دەنگۆیە و هیچ بنەمایەکی رەسمی نییە،ئەندامێکی ئەنجومەنی نوێنەرانی عیراقیش دەڵێت: ناتوانرێت بەم چەند رۆژە کەمەی پێش جەژن، مووچەی سەرجەم مووچەخۆرانی عیراق دابەش بکرێت.

چەند کەناڵ و سەکۆییەکی سۆشیال میدیا،دەنگۆی دابەشکردنی مووچەیان لە پێش جەژنی رەمەزان بڵاوکردووەتەوە، بەڵام هیچ بنەمایەکی راستی نییە.
مازن غەریب، ئەندامی ئەنجومەنی نوێنەرانی عیراق لە فراکسیۆنی یەکێتی بە PUKMEDIA ی راگەیاند: دابەشکردنی مووچەی مانگی ئازار، لە پێش جەژنی رەمەزانی پیرۆز، تەنها دەنگۆیە و وەزارەتی دارایی عیراق بە رەسمی هیچ شتێکی لەو بارەیەوە بڵاونەکردووەتەوە.

ئاماژەی بەوەشکرد: تەنها چەند رۆژێکی کەممان ماوە بۆ هاتنی جەژنی رەمەزان و لەو ماوە کەمەشدا، حکومەتی عیراق ناتوانێت مووچەی سەرجەم مووچەخۆرانی عیراق بە هەرێمی کوردستانەوە دابەش بکات، لەو باوەڕەشدا نیم مووچەی تەواوی مووچەخۆرانی لەبەردەستدا بێت بۆ دابەشکردن.

ئەمەش لەکاتێکدایە، هەفتەی رابردوو لە ماوەی سێ رۆژدا مووچەخۆرانی هەرێم، مووچەی مانگی شوباتیان پێدرا،بەڵام بۆ مووچەی مانگی ئازار هیچ کاتێکی دیاریکراو نییە، چونکە لە عیراقیش دابەشکردنی مووچەی مانگی ئازار دەستی پێنەکردووە.

PUKMEDIA