وتەبێژی یەکێتی: سیناریۆی دیکە بۆ دواخستنی هەڵبژاردن رەتدەکەینەوە

Kurdsat News

سەعدی ئەحمەد پیرە وتەبێژی یەکێتیی نیشتمانیی کوردستان

سەعدی ئەحمەد پیرە وتەبێژی یەکێتیی نیشتمانیی کوردستان هەڵوێستی یەکێتی سەبارەت بە هەڵبژاردنی پەرلەمانی کوردستان ئاشکراکرد و راشیگەیاند: "لە سەرەتاوە ئامادەی هەڵبژاردن بووین، گەر بە خواستی یەکێتیش بووایە دەبوا لە 10ـی 6 هەڵبژاردن بکرایە، هەرکاتێکیش بێت ئامادەین و هەموو ئەو سیناریۆیانە رەتدەکەینەوە کە جارێکی تر باس لە دواخستنی هەڵبژاردن دەکەن".

یەکێتی ئامادەبووە و ئامادەیە

سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند: "یەکێتی لە سەرەتاوە لەگەڵ ئەنجامدانی هەڵبژاردن بووە و ئێستاش بە هەموو شێوەیەک ئامادەین".

"بۆ دیاریکردنی رۆژی هەڵبژاردن راوێژ بە لایەنەکان نەکراوە، هەروەها هەموو ئەو سیناریۆیانە رەتدەکەینەوە کە جارێکی تر باس لە دواخستنی هەڵبژاردن دەکەن و لە ئێستادا هیچ بەربەستێک لە بەردەم هەڵبژاردندا نییە"، وتەبێژی یەکێتی وادەڵێت.

یەکێتی لەگەڵ هەڵوەشاندنەوەی کورسی کۆتاکان نەبووە

وتەبێژی یەکێتیی نیشتمانیی کوردستان ئاماژەی بەوەشدا: "لەسەر داواکاری یەکێتی سنووری هەڵبژاردن کرا بە چوار بازنە، گەر بە خواستی یەکیتیش بووایە دەبوا 10ـی 6 هەڵبژاردن بکرێت، نیگەرانیشین لە چەند جار دواخستنی هەڵبژاردن".

"یەکێتی هەرگیز لەگەڵ هەڵوەشاندنەوەی کورسی کۆتاکان نەبووە و بەردوام بووین لە هەوڵەکانمان بۆ گەڕانەوەی پێنج کورسی کۆتاکان و سەرکەوتووبووین"، سەعدی ئەحمەد پیرە وای وت.

لەم هەڵبژاردنەدا ساختەکاری ناکرێت

سەعدی ئەحمەد پیرە وتیشی: "لەم هەڵبژاردنە وەک رابردوو ساختەکاری ناکرێت و دەنگەکان ناگۆڕدرێن و رێگا نادرێت ئاوارەکان لە هەرێم بە دۆکیۆمێنتی ساختە دەنگ بدەن، هەروەها لەم هەڵبژاردنەدا تۆماری دەنگدەران لە مردوو و ئەو کەسانە پاک دەکرێتەوە کە رەگەزنامەی عیراقییان نییە".
PUKMEDIA