ئەنجومەنی پارێزگای کەرکوک یەکەم کۆبوونەوە ئەنجامدەدات

لەتۆڕە کۆمەڵایەتییەکانەوە

ژمارەیەک لە ئەندامانی ئەنجومەنی پارێزگای کەرکوک

ئەنجومەنی پارێزگای کەرکوک رۆژی پێنجشەممە ١-٢-٢٠٢٤یەکەم دانیشتنی خۆی دوای سوێندخواردنی ئەندامەکانی ئەنجامدەدات.

د.ئەحمەد فاتح ئەندامی ئەنجومەنی پارێزگای کەرکوک لە لێدوانێکیدا بە سایتی رەسمیی یەکێتیی نیشتمانیی کوردستان PUKMEDIA ی راگەیاند:" بەپێی ئەو دەسەڵاتەی یاسا پێی داوە، پارێزگاری بە وەکالەتی کەرکوک ئەندامانی ئەنجومەنی پارێزگاکەی ئاگادارکردووەتەوە کە پێویستە رۆژی پێنجشەممە ئەنجومەنی پارێزگاکە یەکەم دانیشتنی خۆی ئەنجام بدات".


"هاوپەیمانی کەرکوک هێز و ئیرادەمانە ئامانجێتی بە یەک تیم لەگەڵ ئەندامانی دیکەی ئەنجومەنەکە کار بۆ خزمەتی کەرکوکییەکان بکات و ململانێی سیاسییەکان بخاتەلاوە"، د.ئەحمەد فاتح وایوت


رۆژی ٢٩ی ١ی ٢٠٢٤، لە دادگای تێهەڵچوونەوەی کەرکوک ١٥ کاندیدی دەرچووی پارێزگاکە جگە لە راکان جبوری پارێزگاری بە وەکالەتی ئێستای شارەکە، سوێندی یاساییان خوارد و وەک ئەندامی ئەنجومەن دەستبەکاربوون، بڕیارە لەچەند رۆژی داهاتووشدا یەکەم کۆبوونەوەی خۆیان لە ئەنجومەنەکە ئەنجام بدەن.

بەپێی یاسا لەماوەی مانگێکدا راکان جبوری وەک کاندیدێکی دەرچووی ئەنجومەنی پارێزگاکە، پێویستە سوێندی یاسایی بخوات، ئەگەر تا ئەو وادەیەش سوێندی یاسایی نەخوات مافی ئەندامێتی لە ئەنجومەنەکە لەدەستدەدات.

دوای  18ساڵ، رۆژی 16-12-2023، دەنگدانی تایبەت و رۆژی 18ی هەمان مانگ دەنگدانی گشتی بۆ هەڵبژاردنی ئەنجومەنی پارێزگاكانی عیراق بەڕێوەچوو،  ئەمە جگە لەوەی کە ماوەی زیاتر لە 7 ساڵە ئەنجومەنی پارێزگاکە هیچ کۆبوونەوەیەکی ئەنجام نەداوە.

 
هاوپەیمانی كەركوك هێز و ئیرادەمانە کە لەنێوان یەکێتی نیشتمانیی کوردستان و حزبی شیوعی کوردستاندا پێکهێنرا بە بەدەستهێنانی 157 هەزار و 639 دەنگ یەكەمی كەركوك بوو ، كە دەكاتە لە 43% ی دەنگەكانی ئەو پارێزگایەو بەمەش بووە خاوەنی 5 كورسی ئەنجومەنی پارێزگای كەركوك. 

PUKMEDIA