گرانی نرخی کارەبا ناڕەزایی زیاتری لێدەکەوێتەوە

PUKMEDIA

کۆنگرەی رۆژنامەوانی کۆمەڵێک چالاکوانی مەدەنی لەپارێزگای سلێمانی

گرانی نرخی کارەبای نیشتمانی کە لەژێر ناونیشانی پرۆژەی رووناکیدا دەدرێت بە هاووڵاتیان، تادێت ناڕەزایی زیاتری لێدەکەوێتەوە و کۆمەڵێک چالاکوانی مەدەنیش رایدەگەیەنن: نرخی کارەبا لە هەرێم 15 هێندەی عیراق زیاترە و پێویستە حکومەت بیر لەداهاتی خەڵک بکاتەوە.

دوانیوەڕۆی ئەمڕۆ کۆمەڵێک چالاکوانی مەدەنی لەپارێزگای سلێمانی لەکۆنگرەیەکی رۆژنامەوانیدا رایانگەیاند: حکومەت لەڕێگەی پرۆژەی (ئی پسووڵەوە) خەڵک ناچار دەکات کە پارەی کارەبا بدەن، لەکاتێکدا لەسەرانسەری هەرێمی کوردستان بەراورد بە مانگەکانی رابردوو پارەیەکی هێجگار زۆر بۆ خەڵک هاتووەتەوە و هۆکارەکەشی دیارنییە.

راشیانگەیاند: نرخی کارەبا لەهەرێمی کوردستان بەراورد بە پارێزگاکانی دیکەی عیراق 15 جار زیاترە ئەمە جگە لەوەی، کە نرخی نەوت و بەنزینیش بەراورد بە عیراق گرانبووە، بۆیە پێویستە حکومەتی هەرێم بیر لەداهاتی خەڵک بکاتەوە دواتر بڕیاری زیادکردنی کرێی خزمەتگوزارییەکان بدات، لەکاتێکدا خودی حکومەت خۆی هەموو مانگێک دابەشکردنی مووچە دوادەخات و لەساڵێكیشدا چەند مانگێک دابەشی ناکات.

ئاماژەیان بەوەشکرد، پێویستە ناڕەزاییەکان لەدژی گرانبوونی نرخی کارەبا یەکبخرێن و پەیامێکی جددی بە حکومەت بدرێت، هاوکات خەڵک هۆشیار بکرێتەوە کە لەڕێگەی (ئی پسووڵەوە) پارەی کارەبا نەدەن، تا ئەو کاتەی بڕیارێک لەسەر نرخی کارەبا دەدرێت.

ئەو کۆمەڵە چالاکوانە مەدەنییەی سلێمانی راشیانگەیاند: حکومەت بەهەموو جۆرێک هەوڵی تاڵانکردنی گیرفانی خەڵک دەدات و بەڕێگەی جیاجیا خەرجی بە خەڵک زیاد دەکات، بۆیە گرنگە هاووڵاتیان هۆشیار بن و رێگە نەدەن هیچ بڕیارێکی نایاسایی بەسەریاندا بسەپێنرێت.

PUKMEDIA