وەرزی خۆ کۆکردنەوەیە!

شوان کەریم کابان

بەداخەوە گەلەکەمان هەر چەند ساڵێک جارێک، کارەساتێکی لێ دەقەومێ و تووشی نەهامەتی و دەردەسەری دەبێت. 

رووداوەکانی رۆژئاوا – سوریا، هەمدیسان گەلەکەمانی خستۆتە سەر دووڕییانێکی پڕ مەترسی. هێزەکانی سەر بە حکومەتی کاتیی سوریا، ئەگەرچی بەندە بڕوای وایە ئەگەر بەناوی تریش بێت، ئەم دەستە و تاقمە بەردەوام دەبن لە حوکمدا، شارەکانی کوردستانیان گەمارۆداوە و مەترسیی ئەوە لە ئارادایە پەلاماریان بدەن و قەتڵوعام رووبدات، ئەگەرچی شەڕڤانان لەوپەڕی ئامادەباشیدان.

ئەوەی جێی داخ و نیگەرانیی قووڵە، هەڵوێستی وڵاتە زلهێزەکانە، بەتایبەت ئەوانەی شەو و رۆژ دەهۆڵی دۆستایەتی کوردیان لێدەدا، کاتێک جارێکی تر بۆنی نەوت و گاز گێژی کردن و هاوڕێکانی خۆیان لەیاد کرد. 

ئەمە حەقیقەتێکی تاڵە، بەڵام راستییەکی مێژووییە و بۆ ئایندەش هەروایە. ئەوە مەملەکەتەکەی شێخ مەحمود، کۆماری کوردستان، شۆڕشی ئەیلول و هەرەس، ئەوە بێدەنگبوونی هاوپەیمانان لە راپەڕینی 1991 و ئاوارەبوونی خەڵکی کوردستان، ئەوە 31ی ئاب و شانزەی ئوکتۆبەر، هەموو ئەمانە ئەو بۆچوونە دەسەلمێنێ کە دەڵێ: کورد جگە لە شاخەکان هیچ دۆستێکی  تری نییە! 

ئەم پێشەکییەم بۆ ئەوە بوو بڵێم: ئێمەی کورد تەنیاین، جگە لە شاخ وخۆمان و ئیرادەی خۆمان، هیچی ترمان نییە، بۆیە وەرزی خۆکۆکردنەوەیە! دەبێت بیری جددی لە یەکڕیزی بکەینەوە، لەژێر هەر ناوێکدا بێت، هاوپەیمانییەک، بەرەیەک دروستبکرێت، وەک سەردەمی راپەڕین گەلەکەمان یەکخەین و ساز و ئامادەی بکەین. هەموو ئەگەرەکان لێکبدەینەوە و هەڵیان سەنگێنین. سەنگەرەکان ئاوەدان و گەرم بکەینەوە! جارێکی تر لە ناخماندا ئیرادەی بەرەنگاربوونەوە و سووربوون لەسەر کوردبوون زیندووبکەینەوە. ئەگەر پێویستیش بکات، وەک سەردەمی شۆڕش هێلانەی هەڵۆکان مشت و ماڵ بکەینەوە.ئەوەی تا ئێستا لە کوردستان بەدیهاتووە، قوربانیدان و رەنج و ماندووبوونی سەدان هەزار کەسی ئەم کوردستانەیە بە پیر و گەنج و منداڵ و ژن و پیاوەوەیە، ناکرێ دوژمن و ناحەزان زەفەری پێبەرن. پاراستنی ئەرکی هەموومانە، بەتایبەتی ئەوانەی هەردەم لە سەنگەری روبەڕوبونەوەدابوون و لەهەر شوێنێک سەنگەری بەرەنگاربوونەوەی لێ بووبێت لەوێ بوون، جارێکی تر دەیڵێمەوە، هەڤاڵان وەرزی خۆ کۆکردنەوەیە!.

PUKMEDIA