کۆبانێ پشتی یـازدە ساڵان جارەکا دی دیرۆکا ئەفسانەیی یا هەبوونێ تۆماردکەت

محەمەد مەهیدی

پشتی  یازده‌ ساڵان لسەر ڕزگارکرنا کۆبانێ و تۆمارکرنا قەهرەمانیێن مەزن بسەر رێكخراوا تیرۆریستی یا داعش دا , کو ب ڕاستی ژی شه‌ڕێ كۆبانێ شه‌ڕێ مان و نه‌مانێ بوو. ئه‌و شكاندنا كو سه‌ركه‌فتنا كۆبانێ ب سه‌ر داعش دا ئینا، ب تنێ یا سه‌ربازی نه‌بوو؛ به‌لكو شكاندنه‌كا هزری و ئه‌خلاقی ژی بوو، كو بنگه‌هێن وێ هه‌ڕفاندن و لایه‌نێ وێ یێ خویناوی راوه‌ستاند.

كۆبانێ ده‌سپێكا راستیێ بوو بۆ دوماهی هاتنا داعش، و په‌یامه‌كا بلند بوو بۆ هه‌می جیهانێ كو: توندڕه‌وی ل هه‌مبه‌ر ئیرادا گه‌لێن ئازاد خۆ ناگریت.

کۆبانێ ئەو دیرۆکە تۆمارکر , کو هەمی گەل و هێزێن جیهانێ مەندەهۆش کرن , دهەمان دەمدا سەرێ گەلێ کورد ل هەمبەر هەمی گەلێن ئازادیخواز بلند کر.
د بەرامبەر دا هـێزین شۆڤێنی و تاریك پەرست و پشتەڤانێن تیرۆر و توندڕەویێ شەرمزار و حێبەتی کرن . وانەیەك نیشا وان دا , کو چ قاس هێز و پارە و تەکنەلۆژیا وان یا سەردەم بێخنە خزمەتا تیرۆریست و تاریك پەرستان , بەلێ نەشێن خۆ لبەر ئیرادە و باوەرییا موکم یا گەلێن ئازادیخواز بگرن.

ئه‌ڤرۆ ژی پشتی یازده‌ ساڵان، باژێرێ كۆبانێ روو ب روویێ هێرش، گڤاشتن و دوورپێچان دبیتە ڤه‌، ب مه‌ره‌ما شكاندنا ئیرادا گه‌لێ وێ و تێكدانا وێ ئارامیا ب فیداكاریێن مه‌زن و تێکشاندنا پیلانێن دۆژمنان هاتیه‌ ب ده‌ستخستن. ئارمانجكرنا كۆبانێ ئه‌ڤرۆ، هێرشه‌كا ئێكسه‌ره‌ بۆ سه‌ر ره‌مزا سه‌ركه‌فتنا وێ ل سه‌ر داعش ، و بزاڤه‌كا تۆله‌ڤه‌كرنێ یه‌ ژ وی باژێرێ كو پڕۆژێ وان ژناڤبری.

بەلێ د دوماهیێ دا، كۆبانێ  ب هەمان رۆحیەت و مۆرالا  بەری یـازدە ساڵان دێ هه‌ر مینیت ره‌مزه‌كا نه‌مر بۆ به‌ڕەڤانی و خۆڕاگریێ.  چونکە  ئه‌و سه‌ركه‌فتنا به‌ری یازده‌ سالان ل کۆبانێ هاتیه‌ ب ده‌ستخستن، ب تنێ بیرهاتن نـینه‌؛ به‌لكو په‌یمانه‌كا نوی یه‌ بۆ به‌ڕه‌ڤانیكرنێ ژ ئازادیێ، پاراستنا خوینا شه‌هیدێن رۆژئاڤا و ئاڤاكرنا پاشه‌رۆژه‌كا ئارام بۆ گه‌لێ وێ. 

دگەل تۆمارکرنا داستانێن دیرۆکی , کۆبانێ بوویە پەیمانا ئێکگرتن و ئێکڕێزییا گەلێ کورد ل هەمی پارچێن کورستانێ , ئێکگرتنەك کو مۆرالا گەلێ مە هندە بلند کریە ئێدی سنوورێن دەستکرد ناس نەکەن و چ هێز و دەولەتەکا داگیرکەر نەشییا وان سنوورێن دەستکرد ل هەمبەر ئیرادا گەل ب داخستی بهێلیت. 
ئێکگرتنەك کو چ حزب یان سەرکردە یان هێزەکا سیاسی کوردستانی ژی  د خەباتا خۆ ئا سیاسی دا نەشیایە وێ ئێکگرتن و ئێکرێزیێ دناڤ گەلێ کورد دا  ب هەمی هزر و بـیرێن جودا ڤە دروست بکەت.


ل دوماهیێ ژی هەمی ئەو هێزێن ب پیلان و پشتەڤانیا تیرۆریستان دخوازن ئیرادەیا گەلێ کورد بشکێن دێ ل کۆبانێ یا کەلها بەرخۆدانێ و لسەر دەستێ شەرڤانێن پاراستنا رۆمەتێ و گەلێ وێ یـێ بەرخۆدێر مـینن شەرمزار و قەردارێن گەلێ کورد ,  دێ بـیتە وانەیەك ژی بۆ وان هێزێن کوردستانی یـێن هەتا نـها دچەپەرێ دۆژمنان دا  ل دژی رۆژئاڤا کاردکەن , داکو پێداچـوونەکی د هەڵویست و ڕەفتارێن خۆدا بکەن و ڤەگەرنە سەر  هـێلا نەتەوەیی و نیشتمانی.

PUKMEDIA