کەس قاو مەدەن!

ستران عەبدوڵلا

ژمارەی کورد لە دونیادا سەد ملێۆنیش بێت هێشتا کەمە و نابێ خەڵکی لێ دەربێنین و بەناوی جیاجیاوە قاویان بدەین، بەناوی تەکفیر یان کۆنەپەرستی یان بە بیانووی ئایدێۆلۆژی پوچەوە تەوەللایان بکەین . ئەوی نیەتی خراپە و هەر لە ئەزەلەوە سەنگەری لە نەتەوەکەی خۆی گرتووە هەڵایان لەسەر مەکەن و بەس مقەیەتیان بن ، رووداوەکان خۆی پاک و پیس پۆلین دەکات.

کەسمان مەرجەع و فەتوادەری دەرکردنی کەس نین لە بەهەشتی نەمری کورد بووندا ، ئەسڵەن کوردبوون رەنگە تەنها لە کاتی سەرکەوتن و فەرەحناییدا بەهرەی دابێتەوە بۆ هەندێک کەس و دەسکەوتی پێدابن. دەنا هێشتا کاتەکانی سەرکەوتن و فەرەحنایی لە مێژووی کوردایەتیدا لەوە کەمترن خۆپەرستەکان خۆیانی پێوە بادەن و وەبەرهێنانی خودخوازی و شەخسی تیا بکەن. 

راستێکەی خۆپەرستەکان بە تایتلی ترەوە قازانج دەکەن و کاسبی کەڵەکە دەکەن. فێڵبازەکانی کوردایەتی زوو کەشف دەبن و جیاکردنەوەیان بە موو و بە پڕگاڵ کاری دامەزراوەی گەورەترن. ئێستا کاری هەر کوردپەروەرێک ئەوەیە فەرهەنگی کوردبوون بگەشێنێتەوە و پێوەرەکانی کوردایەتی لە هەموو سەکۆ و مینبەرە گشتییەکان بڵاو بکاتەوە و سەروەریان بکات . 

کەوای کرد پێوەرەکان وەک مەرجەع دەبن کە  گشتمان بۆی بچین و گشتمان لە دەوری کۆببینەوە و گشتمانی بۆ هان بدەین. ئیتر خۆی فەرز دەبێ و حوکمی خۆی دەدات. 

بۆ ئەم ئەرکە تازانەی خەبات سەد ملێۆنی ترمان پێویستە بە کوردی کەرکوک تا حەسەکە، مەهاباد تا سلێمانی و هەولێر و دیابەکر و کوێ وکوێشەوە ،  بە ملێۆنەکانی بەشیر مشیر لە وڵاتی چین و ماجینەوە. ئاخر بۆ ئۆزبەکی ئاسیای ناوەڕاست و ئیگۆری وڵاتی چین رێیان دەکەوێتە کوردستانی رۆژئاڤا  و ئێمە کرمانچی چینمان لێ بزرە؟ ئینجا بێین ئەو  کەمەی وڵاتی خۆمانیش بەناوی جیاجیاوە تەولا بکەین. 

لەم وێستگە مەترسیدارەدا برایەتی کورد و کرمانج زویربوونی کەسی نەگەرەکە.

ستران عەبدوڵڵا

PUKMEDIA