قەڵەم یان (پەنجە)ی ژنێک

هاژە باست حەمەغەریب

ئەم قەڵەمە، بووەتە نوقتە (.) بەسەرمانەوە، ئەگەرنا ئێستا بوەتە پەنجە، دەی ئیتر بابەتەکە بە لاڕێیا مەبەن، پەنجە ئەزانم ئیشی خراپیشی زۆر پێ ئەکرێت، بەس من مەبەستم ئەو پەنجەیەیە کە ئەیخەیتە سەر دوگمەی کیبۆردی کۆمپیوتەرەکەت و چوار دێڕی مەعقولی پێ ئەنوسی،

ئێ دەی قەڵەم بێت یان پەنجە، (هەر جاشی ماکەرێکە)، نە بابە وابزانم من بابەتەکانم تێکەڵ کردووە، دەی ناهەقیشم نییە، ئەوەندە درەنگ درەنگ هێزی نوسینم دێتە گۆ، هەر ئاوا ئەیەم بەیەکا، خۆ خوا بەرداری نییە، کە ژنێک قەڵەم دەگرێت بەدەستییەوە، لەم لاو لاوە نازانن چۆن دژایەتی بکەن، هەرکەسەو حەزەکات، عەیب نەبێ، لای خۆیەوە پەنجەیەکی تێخات، (دووبارە پەنجەکە خۆی پیاکردەوە)، مەبەستم ئەوەیە، هەرکەسەو حەزەکات بەردێک بخاتە سەر رێی، قەینا دەی ئەیانیەینە دەست خوا، ژن بە ویژدانیش بێت، پشتیوانیکەرانیش هێندە کەم نین، وەلی داپڵۆسەران کاریگەرییان زیاترە،

یەڵا با بێمەوە سەر ئەسڵی مەسەلەکە، ئەرێ هۆکار چییە ئەوەنە قەڵەمی ژن قورس بووە؟، بە هەرچی راگەیاندنایە بگەڕێ، چوار دانەی راست و رەوان نادۆزیتەوە، خۆ من دڵنیام هزرمان هێندە فراوانە بەشی یەک دەریا نوسین وشەی تیایە، کەچی پەنجەمان یان گۆناکات، یان لەگۆی دەخەن، 

خۆشم نازانم، ئەم دەربڕینانەم نیگەرانی خۆمە لەوان، یان نیگەرانیمە لە کەمی قەڵەمەکان، هێندە دەڵێم، وەکی ئەوەی ناتوانن هاندەربن، روخێنەریش مەبن، من بەم ژنێتییەی خۆمەوە، کەدەچمە بەشی وتاری هەر دەزگایەکی راگەیاندن، کەسەیری سەرو شکڵی ئەم هەموو پیاوەو مانشێتە وشک و رەقەکانیان دەکەم، تاقەتم نییە بیانکەمەوە، ئەبێ وەزعی خوێنەری پیاو خۆی چۆن بێت، کەچی بەپێچەوانەوە، ئەگەر سەری ژنێکی خانومان وەک گوڵالە سورەی بەهار هەڵتۆقیبێ، نوسینەکانی سەرەوەو خوارەوەو ئەملاو ئەولاشی دەکەمەوە، دەی هەر بۆ خاتری زیادبوونی خوێنەری نوسینەکانی خۆتان، هاندەرو پشتیوانی ئەو قەڵەمە رەنگاوڕەنگانە بن، رووی دەمیشم لەهەمووتانە.

PUKMEDIA