لە باكوری سوریاوە بۆ رۆژئاڤای كوردستان.. زمانی (BBC) و دەنگی (BKC)

ژینەر محەمەد

جوگرافیای رۆژئاڤا بەرهەمی خوێن و خەباتێكی درێژ و 14 ساڵ مانەوەیە، بەڵام پایەكانی ئەم ئەزموونە خەریكە لە گەلەكۆمەكییەكی نێودەوڵەتی و هەرێمی نزیك دەبێتەوە لە لێواری شەكەتبوون و بچووكبوونەوە، هەڵبەت بچووكبوونەوەی باكوری سوریا و لەدەستدانی نزیكەی (40%)ی روبەری جوگرافی واتای نەمانی رۆژئاڤا نایەت، وەك (دڵبەخوێن) نووسیبووی: كورد لەو بەشە داگیركراوەدا ئەركی پاراستنی باكوری سوریای لێدەسەنرێتەوە، بەڵام هەرگیز كەس ناتوانێت خاك و خۆڵی رۆژئاڤای لێ زەوت بكات.

ئەزموونی بە خوێن بەدەستهاتووی رۆژئاڤا، لەشرۆڤەی میدیا و ناوەندەكانی توێژینەوەدا وا وێناكراوە كە شكستێكی سەربازییە، بەڵام راستییەكەی نا بەرابەری هێز و قەبارەی گەلەكۆمەكییە و درزی خێڵ و ئێلە عەرەبییەكانی ناو هەسەدە نابێت وەك نشوستی كورد و هێزە چەكدارەكانی ئەو پارچەیە لێكبدرێتەوە، بەڵكو بە تەنیشت پاشەكشەی سەربازی دەشێت باس لە شكستی تێزێكی بیریی بكەین كە پێكەوەژیانی ئاشتیانەی نەتەوەكانە لە هەرێمێكی خۆسەریدا، ئەم تێزەی پەیەدە و بزووتنەوەی كوردی لەو پارچەیە لەسەرەتای بەهاری عەرەبی بووبووە مۆدێلێكی سەرنج راكێش بۆ میدیای جیهانیی و دەستبەژێری دنیا، بەڵام وادیارە هێشتاش ئەندێشەی پێكهاتەی عەرەب لە سوریا بەتایبەت لە دێرەزور و رەقە نەگەیشتووەتە ئاستێك بتوانێت خۆی لەمەیلە شۆڤینییەكەی داببڕێ و بە ئارامی لەژێر چەترێكدا لەگەڵ ئەوانی دیكە بژیت، لەبەرئەوەیە جارێكی تر كورد لەو پارچە پێویستی بە گەڕانەوە هەیە بۆ تێزە دێرینەكەی خۆی، كە رۆژئاڤا ـ یەكی خاڵییە لە هاوبەشی لەگەڵ عەرەبدا.

سەرەتای بەهاری عەرەبی و ئازادبوونی بەشە زۆرەكەی خاكی سوریا، لەژێر رۆشنایی تێزە بیرییەكانی ئۆجەلان، بژاردەی دروست بریتی بوو لە بنیاتنانی كۆمەڵگایەكی دیموكراسی، كە دان بە فرەچەشنی پێكهاتەكانیدا بنێت، دەسەڵات و فیدراسیۆنێك بێتە كایەوە كە پەنا بۆ چارەسەری سەربازی یان تاكڕەوانە نەبات و بنەمای دیالۆگ و سازان و هاوبەشی ببێتە سەرچاوەی پێكهاتن و هێزە چەكدارەكانیش لەسەر هەمان بنەما پێك بێن، ئەو ئەزموونە 14 ساڵ بڕیكرد و بووە فۆڕمێكی دەوڵەتداری، بەڵام بە رێككەوتنی ژێر بەژێری كوڕانی خێڵی بەكارە و ئێل و خێڵەكانی تر و هاوبەشیكردنیان لەگەڵ سوپای شەرع، سەلماندی كە تاكە شتێك هێزی پاراستن بدات بە كوردی ئەو پارچەیە، یەكڕەنگی هێزە چەكدارەكانییەتی، بۆیە رەنگە لە قۆناغی داهاتوودا جارێكی دیكە بە ناوەكانی یەپەگە و یەپەژە ئاشناببینەوە، كە هەر خۆی رواڵەتە كوردییەكەی بزووتنەوەی چەكداری ئەو پارچەیە.

بێدەنگی كۆمەڵگای نێودەوڵەتی و پشتكردن لە كوردی ئەو پارچەیە، بە سایلێنت بوونی میدیای جیهانی بەڵگەیەكی روون و رەوانە كە بەناوی دانوستانەوە بۆ ماوەیەكی كاتی چەكەكانمان بێدەنگ بوون، بەڵام بۆ ئەوەی جیهان ئاوڕت لێبداتەوە، دەبێت بیر لە قسەی ئەو شەڕڤانە بكەینەوە، كە وتی: (بۆ ئەوەی (BBC) لەسەرت بە دەنگ بێت، دەبێت (BKC) بەدەستتەوە بێت).

PUKMEDIA