پێشەوە

کاروان ئەنوەر

چەندین جار كاك فڵان یان خاتوو فڵانم دیوە، لە كۆڕ و سیمینار و كۆبوونەوەكاندا بۆ ریزی پێشەوە هەڵمەتیان بردووە، بەڵام کە رێكەوت وابووە شوێن و كورسی بەتاڵیان لە سافی ئەوەلین بۆ نەماوە، هۆڵەكەیان بەجێهێشتوە.

سەد داخ بۆ لەدەستدانی کورسییەکی یەک سەعاتی یان سەعات و نیوێک بەزیادەوە، کەوایلێکردن نەتوانن ئاستی خۆتان داببەزێننە ناو میللەت تا لە ریزی خەڵكی رەش و رووتدا دابنیشن!

وشەی هەڵمەتبردنم بەكارهێنا، بەڵام هەڵمەتی شۆڕشگێرانە نا، هەڵمەتی خەبات و خوێندن و دڵسۆزیی نا، بەڵكو وەک ئەو هەڵمەتانەی كە موو نەرمەكان بۆ گرتنی سەرچۆپی دەینوێنن.

هەر بەڕاست ساڵانە چەندین كەس لە كێشەی سەرچۆپیدا، دەکوژرێن و بریندار دەبن، خوێنیان لەسەر بابەتێكی هیچ بە فیڕۆ دەڕوات، بریا بمانتوانیایە لەو خەڵكە بگەیەنین سەرچۆپی و گاوانی هەردووكیان جوڵەی جەستەی هونەرین و مرۆڤ لە باڵندە و ئاژەڵەكانەوە سەما و هەڵپەڕكێی وەرگرتووە، ئیتر بۆچی خۆت بە كوشت دەدەیت لەسەر ئەم جووڵەیە كە دەربڕینی ناخی خۆتە و ئەو خۆشییە و ئەو هونەرەی كە دەینوێنیت خەڵك وەك جووڵەیەکی ئیستاتیکی دەیبینێت، چ لە گاوانی بیت یان سەرچۆپیت بەدەستەوە بێت!!

دانیشتن لە ریزی پێشەوەی كۆڕ و كۆبوونەوەكاندا نەخۆشیەکی سەیرە، وەك سەرچۆپی کێشەکە وایە، كە دەست بەرنادات بۆ كەسی تر.

من تێبینی شتێكی سەیرم كردووە لە سلێمانی و لە هەولێریش: ئەویش ئەوەیە ریزەكانی پێشەوە لە سلێمانی هەمیشە ژمارەیەك دەموچاوی دووبارەن لە هەولێریش هەر ئەو  چەند دەموچاوانەن و دووبارەن، بۆیە هەر كۆڕ و سمینار و كۆبوونەوەیەك بخوڵقێت، تۆی بینەر وادەزانیت ئەمە هەمان كۆبوونەوەكەی دوێنێ و پێرێ‌ و پار و پێرارە.

دەموچاوەكان نەگۆڕن و ناگۆڕێن، ریزەكانیش تەنها بۆ ئەو خەڵكانەی ناوەڕاست و دواوە دەگۆڕێن، پێشەوە هەر پێشەوەیە دواشەوە هەر دواوەیە، بەڵام لە پرسەی پیاواندا ریزەکان تێکدەچن، کەچی نە دنیا دەڕوخێت و نە قیامەتیش ھەڵدەستێت، لە گۆڕستانەکانیشدا ھەر یەکێکمان تەنها چەپاڵەیەک زەویمان پێدەبڕێت.
حەزێكی زۆر سادە و ساكاری خەڵكی ئەم كوردستانەتان پێ دەڵێم: ئەوان تەنها داوای یەکسانیی مرۆڤبوون دەکەن، ھەروەک گۆڕستانەکان.

لە دەیان كەسم بیستووە كە خۆزگە دەخوازن بەرپرسانی حزبی و ئیداری و حکومی و پیاوانی ئاینی، لە قۆناغێكی ژیانیاندا تێكەڵ بە شەقام ببن و وەک خەڵكی ئاسایی بن، لە دانیشتن و هەڵسوكەوت و جل پۆشین و حەرەس و حیمایە و جۆری ئۆتۆمبێل و سەعاتی دەست و داهاتی مانگانە و ماین و مایباخ و باخ و كڕینی دوورگە و یەخت و حساباتی بانكی بە یەن و پاوەن و رۆبڵ و ژنی دووەم و سێهەم و چوارەم بە ئاشكرا و بە نهێنی، خزمەتكار و كارەكەری ئۆكرانی و كرواتی و خواردنی ژەمە قوزەڵقورتێك بە چەند هەزار دۆلارێك.

ئەم رەفتارانە و داگیرکردنی ریزی پێشەوە، هەر كاتێك دانیشتووانی دوورگەكانی ئەوەلین ساف دەستبەرداری كورسییەکانیان بوون و تێكەڵ بە میللەتی برسی و موچەخوراو و رەشوڕوت بوونەوە، ئەو كاتە ئاسمان كۆڵەكەی دەوێت.

ئەمەش لە سێگۆشەی خڕ دەچێت.

PUKMEDIA