چەمچەماڵ، فیلمی ژیانێکی کوردانە

هەڵمەت هۆشیار

ئەم دۆخە پڕ لە خەم و ژانەی لافاو بۆ چەمچەماڵی هێنا، دۆخێکە لێوان لێو لە تاسان و ئازار، دۆخێک لە نێوان متبوون بۆ سەر لەنوێ خۆ ئامادەکردن بۆ دەستپێکردنەوە و تێڕامان لە ئومێد بۆ ژیانێکی نوێ.

دانیشتوانی (چەمچەماڵ-شۆرش-تەکيە ) هەوڵی سەرەتا و کۆتاییان ئەوەیە هەرچی زووە کونجێک لە ماڵی شەڵاڵ لە لیتاودا خاوێن بکەنەوە و خۆیان لە دڵڕەقی  و سەرمای پاش باران بپارێزن، دووبارە دەرفەت وەربگرن بۆ بیرکردنەوە و دەستپێکردنەوە، ئەوەی ساڵانێک بە کولەمەرگی و چنگەکڕێ و نەهامەتی بەدەستیانهێنابوو لافاو بێبەزەییانە لە چاوتروکانێکدا رایماڵی، گەرەکیانە دووبارە بە دەستی بهێننەوە.

 کاتێک چاوەکان هەمووی لەسەر چەمچەماڵە، دڵەکان لای چەمچەماڵییەکان و دەستەکان بۆ نزا لە ئاسمانن، گرتەی دیمەنی کۆمەڵایەتی سەر لە نوێ فیلمە دێرینە  رەسەنەکە نمایش دەکاتەوە، فیلمی ژیانێکی کوردانەی جوامێرانە، جیاواز لەوەی کە میدیا و سیاسەت چەندین مانگە دەیانەوێت درزەکان بکەنە کەلێن و دیواری ژیانی کۆمەڵایەتیمان هەرەس پێ بهێنن، هێندەی نەمابوو تۆوی نائومێدی چەکەرە بکات، بەڵام دۆخی کارەستباری چەمچەماڵ سەرباری زامەکانی جەستەی هەموو دەنگ و رەنگەکان بە دیار  خۆیەوە کۆدەکاتەوە و هەموو یەک دەنگ و یەک رەنگ دەیانەوێت ببن بە لۆکە بۆ هەتوانی برینەکانی چەمچەماڵی سەدجار بریندار.

ئەم دۆخە لە هزری کوردانەی عاقڵمەنداندا وێنەیەکی هێندە جێ دڵخۆشییە، ئەستەمە هیچ میدیایەکی نابەرپرسیار و هیچ سیاسییەکی نابەرپرس بتوانێت رەگی ئەم برایەتییەی نێوان شارەکانی نیشتمان ریشەکێش بکات.

 PUKMEDIA