رۆژی شكاندنی داعش

كاروان یاروەیس

كاروان یاروەیس

ئەمڕۆ رۆژی تێكشاندن و سەركەوتنە بەسەر رێكخراوی تیرۆریستی داعشدا، كە شەش ساڵ لەمەوبەر بە رزگاركردنی موسڵ راگەیەندرا. 

داعش لەماوەیەكی كەمدا مەترسی گەورەی لەسەر عیراق و سوریا و تەواوی ناوچەكە و جیهان دروستكرد، كورد یەكەم هێز بوو دڕی بە مەترسییەكە داو لەمەیدانی شەڕدا روبەڕوی داعش بوویەوە، پێشمەرگە و شەڕڤان و دژەتیرۆر و ئاسایش و خۆبەخش و پێشمەرگەی دێرین و خەڵكی كوردستان هاتنە بەرەكەوە، لەئاستی عیراقیش فتواكەی سەماحەتی سیستانی و دروستبوونی حەشد و سوپا، لەئاستی هەرێمی ئێران و لەئاستی نێودەوڵەتی ئەمریكاو هاوپەیمانان رۆڵی گەورەیان گێڕا لە تێكشكاندنی داعشدا. 

لەو قۆناغەشدا، كورد سەلماندییەوە كە هێزێكی كارای بەرەی دژەتیرۆرە، لەهەمان كاتدا بەرگری و قوربانییەكان بۆ پاراستنی كەركوك و خانەقین و خورماتوو و جەلەولا و دەشتی نەینەواو شەنگال دەلالەتی ئەوەبوون ئەم ناوچانە چەند چارەنوسسازن. 

بەداخەوە هەڵە سیاسییەكانی دوای شەڕی داعش، وایانكرد نەك كورد نەییتوانی وەبەرهێنانی سیاسی لە سەركەوتن بەسەر داعش و هاوسۆزی و پشتیوانی نێودەوڵەتی نەكات، بەڵكو پاشەكشەی گەورەی كرد و هەموو ئەو خاكانەی لەدەست دەرچوو كە سەدان پێشمەرگەو فەرماندە لەپێناویدا شەهید و برینداربوون. 

لەم رۆژەدا، سڵاو بۆ رۆحی پاكی شەهیدەكانمان دەنێرین، لەئاستی گڵكۆیاندا دەچەمێننەوە، سڵاو بۆ بریندارەكان دەنێرین، سڵاو بۆ هەموو قارەمانەكان ئەنێرین، سڵاو بۆ كەركوك و خانەقین و هەموو ناوچە كوردستانییە بەناهەق دابڕێندراوەكان دەنێرین و پێیان دەڵێن رۆژی ١٨ ی ئەم مانگە بڕۆنە سەر سندوقەكانی دەنگدان و ئەم خەباتەش تەواوكەری خەباتەكانی ترە و بۆ پاراستنی كوردستانییەتی ئەو ناوچانەیە.
*ئەندامی ئەنجومەنی نوێنەرانی عیراق

PUKMEDIA