سەرۆکی شارەوانی سلێمانی: زیاتر لە 23 هەزار پارچە زەوی بەسەر فەرمانبەراندا دابەشکراون

PUKMEDIA

كۆنگرەی رۆژنامەوانی لەیلا عومەر، سەرۆكی شارەوانی سلێمانی

لەیلا عومەر، سەرۆكی شارەوانی سلێمانی، نوێترین زانیاری لەسەر پڕۆسەی دابەشكردنی زەوی بەسەر فەرمانبەراندا خستەڕو و رایگەیاند: تائێستا لەڕێگەی تیروپشكی ئەلیكترۆنییەوە، زیاتر لە 23 هەزار پارچە زەوی لەسنووری شارەوانی سلێمانی بەسەر فەرمانبەراندا دابەشكراون، هاوكات ئاماژەی بەوەش كرد، كە پڕۆژەی یەكتربڕی شەوكەت حاجی موشیر بەچڕی كاری تێدا دەكرێت و تا كۆتایی ئەمساڵ تەواو دەكرێت.

لەیلا عومەر، سەرۆكی شارەوانی سلێمانی، لەكۆنگرەیەكی رۆژنامەوانیدا نوێترین زانیاریی سەبارەت بەدابەشكردنی زەوی بەسەر فەرمانبەراندا خستەڕو و رایگەیاند:  بەپێی بڕیارەكەی سەرۆكایەتی ئەنجومەنی وەزیران، دابەشكردنی زەوی بەسەر فەرمانبەراندا بەردەوامەو شارەوانی سلێمانیش هاوشێوەی شارەكانی دیكە، ئەو زەوییانەی دیاریی كردووە كە گونجاون بۆ نیشتەجێبوون و تا ئێستاش نزیكەی، زیاتر لە 23 هەزار زەوی بەسەر فەرمانبەرانی سنووری سەرۆكایەتی شارەوانی سلێمانیدا دابەشكراون.

ئەوەشی خستەڕوو: ئەم دابەشكردنە لەڕێگەی تیروپشكی ئەلیكترۆنییەوە بووەو لەئێستادا ناوی ئەو 23 هەزار فەرمانبەرەمان ناردووە بۆ بەڕێوبەرایەتییە پەیوەندیدارەكان و هەندێكیشیان نێردراون بۆ تاپۆ و تۆماركردن.

سەرۆكی شارەوانی سلێمانی راشیگەیاند: تیمەكانی سەرۆكایەتی شارەوانی سلێمانی لەكۆتایی ساڵی پارەوە بەجددی بەدواداچوونیان بۆ تەواوی ناوچەكانی سلێمانی كردووە، بۆئەوەی بزانین زەوی كام شوێنە گونجاوە بۆ دابەشكردن. 

ئەوەشی خستەڕوو: لیژنەكانی سەرۆكایەتی شارەوانی سلێمانی كەلەماوەی رابردوودا 23 هەزار پارچە زەویان دابەشكردووە، بەبێ دابینكردنی بودجەی تایبەت و دابینكردنی پێداویستییەكان، سەرجەم كارەكان بە تیمی خۆبەخشی سەرۆكایەتیمان كراون.

سەبارەت بەپڕۆژەی یەكتربڕی شەوكەت حاجی موشیر، سەرۆكی شارەوانی سلێمانی رایگەیاند: زۆر بەچڕی كار لەپڕۆژەكەدا دەكرێت و بڕیارە تاكۆتایی ئەم ساڵ تەواوبكرێت، چونكە بە پلانێكی ورد لەلایەن تیمی ئەندازیاری شارەوانی سلێمانی و تیمی ئەندازیاری كۆمپانیاوە جێبەجێ دەكرێت.

PUKMEDIA