شێخ جەعفەر بۆ تاوتوێكردنی یەكخستنەوەی پێشمەرگە كۆبوونەوەیەكی گرنگ بەڕێوەدەبات

راگەیاندنی سەرۆكایەتیی هەرێم

سەرۆكایەتیی هەرێم

ئەمڕۆ دووشەممە 16ی 2ی 2026، لەسەرۆكایەتیی هەرێمی كوردستان، شێخ جەعفەر شێخ مستەفا، جێگری سەرۆكی هەرێم، سەرپەرشتی كۆبوونەوەیەكی گرنگی بۆ تاوتوێكردنی قۆناغەكانی پڕۆسەی رێكخستنەوە و یەكخستنەوەی پێشمەرگە، بەئامادەبوونی ژمارەیەك لەلێپرسراوان لەسەرۆكایەتیی هەرێم و حكومەتی هەرێم و لێپرسراوانی دامەزراوە سەربازییەكان و فەرماندەكانی پێشمەرگە، كرد.

لە كۆبوونەوەكەدا، پێداچوونەوە بەكار و هەنگاوەكانی ئەو لیژنە تایبەتمەندانەدا كرا، كە لەماوەكانی رابردوودا كاریان لەسەر پڕۆسەكە و هەروەها دیاریكردنی دەسەڵاتە جیاجیاكانی هەردوو فەرماندەیی دەڤەری یەك و دەڤەری دووی هێزەكانی پێشمەرگە كردووە.

پاش تاوتوێكردنی كاری لیژنەكان و پەسندكردنی بڕیارەكانیان، وێڕای كۆتاییهێنان بەئەركی لیژنەكان، بڕیار درا كار بۆ سەرخستنی پڕۆسەی رێكخستنەوەو یەكخستنەوەی پێشمەرگەو هەروەها ئەو قۆناغانەی كە لەپڕۆسەكەدا ماون، بكرێت.

PUKMEDIA