وەزیری رۆشنبیری پەیامێك لەبارەی سیاسەتی كولتوورییەوە ئاڕاستەی ناوەندە زانستییەكان دەكات

راگەیاندنی وەزارەتی رۆشنبیری و لاوان

حەمەی حەمەسەعید، وەزیری رۆشنبیری و لاوانی حكومەتی هەرێمی كوردستان

حەمەی حەمەسەعید، وەزیری رۆشنبیری و لاوانی حكومەتی هەرێمی كوردستان لە بارەی سیاسەتی كولتووریی لە هەرێمی كوردستاندا، پەیامێكی ئاڕاستەی رۆشنبیر و نووسەر و ئەكادیمییەكانی كوردستان كرد.

ئەمڕۆ لە چوارچێوەی كارەكانی دووەم رۆژی یەكەم دیداری زانستیی "سیاسەتی كولتووری"، وەزیری رۆشنبیری و لاوان لە وتەیەكدا، رایگەیاند: وەزارەت چاوەڕوانی كارابوونی پەرلەمانی كوردستان دەكات، بۆ ئەوەی پەرلەمان پڕۆژەیاسای سیاسەتی كولتووری لە هەرێمی كوردستان بخاتە كارنامەی كارییەوە و وەك یاسا پەسندی بكات.

وتیشی: پڕۆژەكە، هێشتا لە قۆناغی داڕشتنەوەدایە و پێویستیی بە ڕا و شارەزایی و ئەزموون و پێشنیازی دڵسۆزان و  خەمخۆرانی سیاسەتی كولتوورییە لە كوردستاندا بۆ ئەوەی كامڵ بكرێت.

لەو بارەیەوە، حەمەی حەمەسەعید، وەزیری رۆشنبیری و لاوان بانگەوازی كرد، هەر كەس و ناوەندێكی كولتووری و زانستیی لە ناوخۆ و دەرەوەی كوردستان، پێشنیاز و بۆچوونێكی هەیە بۆ دەوڵەمەندكردنی پڕۆژەكە، ئاڕاستەی وەزارەتی رۆشنبیری و لاوانی بكات، بۆ ئەوەی كاری لەسەر بكرێت.

وتیشی: لە وەزارەتدا لیژنەیەكی تایبەتمەند بە داڕشتنی پڕۆژەی سیاسەتی كولتووری لە ئەركدایە و هەر پێشنیاز و راسپاردە و بۆچوونێك ئاڕاستەی وەزارەت بكرێت، دەخرێتە بەردەست ئەو لیژنەیە بۆ لەبەرچاوگرتن و جێكردنەوەی لە پڕۆژەكەدا.

پڕۆژەی سیاسەتی كولتووری لە وەزارەتی رۆشنبیری و لاوان، لە كۆتایی كابینەی هەشتەمدا كاری سەرەتایی لە بارەوە كرابوو و لە كابینەی نۆیەمدا، وەزیری رۆشنبیری و لاوان لیژنەیەكی تایبەتمەندی راسپارد بۆ تەواوكردنی كارەكانی و بە هۆی كارانەبوونی پەرلەمانی كوردستانەوە، نەتوانراوە لەڕێگەی ئەنجوومەنی وەزیرانەوە پڕۆژەكە رەوانەی پەرلەمان بكرێت.

PUKMEDIA