خانمە دیزاینەرێكی كورد وەك باڵیۆزی پاریس فاشن ئێر دەستنیشانكرا

PUKMEDIA

بەشێك لە دیزاینەكانی براندی نوقڵە

نوقڵە، خانمە دیزاینەری كورد، وەك باڵیۆزی پاریس فاشن ئێر دەستنیشانكرا و دەڵێت: نوێنەرایەتی ئەم پلاتفۆرمە جیهانییە بەناوبانگە دەكەم و بەشداریی لە گەشەكردنی مۆدە لە ناوچەكەماندا دەكەم، هاوكات دەبمە پردی پەیوەندی لەنێوان گەلی كورد و فەڕەنسا لەڕووی كلتور و زمان و فەرهەنگەوە.

نوقڵە عوسمان، خاوەنی براندی نوقڵە، بەوێبسایتی رەسمی یەكێتیی نیشتمانیی كوردستان، PUKMEDIA ی راگەیاند: بە شانازییەوە رایدەگەیەنم كە وەك باڵیۆزی پاریس فاشن ئێر لە كوردستان-عیراق دەستنیشانكراوم و بەوپەڕی خۆشحاڵییەوە نوێنەرایەتی ئەم پلاتفۆرمە جیهانییە بەناوبانگە دەكەم و بەشداریی لە گەشەكردنی مۆدە لە ناوچەكەماندا دەكەم، مۆدەیەك كە رەنگدانەوەی كولتوور و ناسنامە و داهێنانمانە.

راشیگەیاند: گرنگی بوونم بە باڵیۆزی پاریس فاشن ئێر لە كوردستان-عیراق، لەوەدایە كە دەبمە پردی پەیوندی لەنێوان گەلی كورد و فەڕەنسا لەڕووی كلتور و زمان و فەرهەنگەوە، لەو رێگەیەشەوە كلتوری كوردیی بەجیهان دەناسێنم، چونكە ساڵانە لەوەرزی بەهار و پایزدا بەرهەمی ئەو دیزاینەرانەی كە دەیانەوێت بەشداری بكەن، دەبەمە پاریس، ئەمەش دەرگایەكی گرنگ بەڕووی دیزاینەرانی كورد دا دەكاتەوە بۆ هەنگاونان بۆ سەر رێڕەوێكی گەورە و نێودەوڵەتی.

نوقڵە عوسمان راشیگەیاند: بەشداریكردن لە PFA لە نمایشێك زیاترە، چونكە دەرفەتێكی بەهێزە بۆ بەرزكردنەوەی براندی دیزاینەرانی كورد لەسەر ئاستی جیهانی و نمایشكردنی كارەكانیان لەبەردەم بینەرێكی هەمەچەشن و كاریگەردا.

پاریس فاشن ئێر PFA وەك یەكێكە لە كاریگەرترین و گەورەترین پلاتفۆڕمی نێودەوڵەتی مۆدەی پیشەسازی، وەرزی رابردوو پێشوازی لە زیاتر لە دوو هەزار و 500 میوان و زیاتر لە 15 دیزاینەری نێودەوڵەتی و كەسایەتییە ناودارەكان و كاریگەرەكان و دەزگا میدیاییە گەورەكان كرد.

PUKMEDIA