ده‌سته‌ی سه‌ربه‌خۆی مافی مرۆڤ: ته‌قه‌كه‌رانی گوندی لاجان ده‌ستگیربكرێن

پەیجی ده‌سته‌ی سه‌ربه‌خۆی مافی مرۆڤ

لۆگۆی ده‌سته‌ی سه‌ربه‌خۆی مافی مرۆڤ

ده‌سته‌ی سه‌ربه‌خۆی مافی مرۆڤ له‌هه‌رێمی كوردستان له‌باره‌ی توندوتیژییه‌كانی به‌رده‌م كۆمپانیای لاناز راگه‌یه‌نراوێك بڵاوده‌كاته‌وه‌و ئاماژه‌ بۆ ئه‌وه‌ده‌كات: وێڕ‌ای پشتگیری كردن له‌داواكاری هاووڵاتیان بۆ دابینكردنی ژیان و مافه‌كانیان له‌هه‌مان كات پشتیوانی له‌گردبونه‌وه‌كان ده‌كه‌ین و به‌ڕ‌ێكاری یاسایی و مه‌ده‌نی دوور له‌توندوتیژی و هه‌میشه‌ دژی به‌كارهێنانی چه‌ك و توندوتیژین و دڵنیاتان ده‌كه‌ین كه‌به‌رده‌وام ده‌بین له‌چاودێریكردنی ئه‌م كه‌یسه‌ و ده‌ره‌نجامی لێكۆڵینه‌وه‌كان و پێویسته‌ ته‌قه‌كه‌ران و تۆمه‌تباران به‌زوویی بدۆزرێنه‌وه‌ بدرێنه‌ دادگا.

ئه‌وه‌شخراوه‌ته‌ڕوو: ده‌سته‌ی سه‌ربه‌خۆی مافی مرۆڤ ئیدانه‌ی هه‌ر جۆره‌ توندوتیژیه‌ك ده‌كات كه‌ ببێته‌ هۆی به‌كارهێنانی چه‌ك و كوشتنی لێ بكه‌وێته‌وه‌، هه‌روه‌ها بۆ ئه‌و مه‌به‌سته‌ به‌فه‌رمانی سه‌رۆكی ده‌سته‌ له‌نزیكه‌وه‌ تیمێكی تایبه‌تی ده‌سته‌ی مافی مرۆڤ به‌سه‌رۆكایه‌تی خاتو تاڤگه‌ عومه‌ر به‌ڕ‌ێوه‌به‌ری گشتی فه‌رمانگه‌ی یاساو پاراستنی مافی مرۆڤ و وه‌فدێكی نارده‌ شوێنی ڕ‌ووداوه‌كه‌و له‌وێ له‌گه‌ڵ چه‌ند كه‌سێكی مه‌ده‌نی گفتوگۆیان كرد له‌سه‌ر ڕ‌ووداوه‌كه‌.

ده‌سته‌ی سه‌ربه‌خۆی مافی مرۆڤ ئه‌وه‌شده‌خاته‌ڕوو: دوای گفتوگۆی تیمی ده‌سته‌ و هه‌ریه‌ك له‌پارێزگاری هه‌ولێرو به‌ڕ‌ێوه‌به‌ری ئاسایشی هه‌ولێر بۆمان ده‌ركه‌وت كه‌ لێكۆڵینه‌وه‌ به‌رده‌وامه‌و به‌ڵگه‌كان كۆكراونه‌ته‌وه‌ بۆ دۆزینه‌وه‌ی ئه‌و كه‌سانه‌ی ته‌قه‌یان كردووه‌و ئاماژه‌یان به‌وه‌داوه‌ هه‌ركه‌سێك ته‌قه‌ی كردبێ ڕ‌ێكاری یاسایی به‌رامبه‌ر ئه‌نجامده‌درێت.

ڕ‌ۆژی شه‌ممه‌ 29ی11، دوای ئه‌نجامدانی گردبونه‌وه‌ی ژماره‌یه‌ك خه‌ڵكی گوندی لاجان له‌سنوری شاری هه‌ولێر له‌به‌رده‌م كۆمپانیای لاناز ڕ‌ێگه‌یان گرتبوون بۆ پێشكه‌شكردنی چه‌ند داواكاریه‌ك توندوتیژی و ته‌قه‌ی لێكه‌وته‌وه‌و بووه‌ هۆی كوژرانی گه‌نجێك و بریندار بوونی چه‌ند كه‌سێكی تر له‌خه‌ڵكه‌كه‌و پاسه‌وانانی كۆمپانیاكه‌، هه‌روه‌ها توندوتیژی به‌رامبه‌ر چه‌ند كه‌ناڵێك و ڕ‌ۆژنامه‌نوسێك به‌كار هاتووه‌.

PUKMEDIA