خولێکی نێودەوڵەتیی لەسەر کاری پەرلەمانی بەمیوانداریی نوێنەری پەرلەمانی کوردستان بەرێوەچوو

PUKMEDIA

خولی ڕاهێنان دەربارەی کاری پەرلەمانی

لە رۆژانی 17-21ی11ی2025، لە پاریسی پایتەختی فەرەنسا، خولێکی چڕی ڕاهێنان دەربارەی کاری پەرلەمانی بەڕێوەچوو، خولەکە بە هاوکاری و لەنێوان ئەنجومەنی پیرانی فەرەنسا (سێنا) و کۆمەڵەی نیشتمانی و بە پاڵپشتیی وەزارەتی ئەوروپا و کاروباری دەرەوە و پەیمانگای نیشتمانی بۆ خزمەتگوزاریی گشتی (INSP)  رێکخرابوو.

خولی ئەمساڵ بە میوانداریی 22 ڕاهێنراوی کرد کە نوێنەرایەتیی 17 وڵاتیان دەکرد، لەوانە: ئەرمینیا، نەمسا، بەڕازیل، کۆماری چیک، ئەڵمانیا، هەنگاریا، هندستان، عیراق، ئوردن، کوردستان، مەنگۆلیا، نەرویج، هۆڵەندا، پۆڵەندا، قەتەر، ئیسپانیا و بەریتانیا، هەروەها بۆ یەکەمجار لە خولەکە نوێنەرێکی پەرلەمانی هەرێمی کوردستان بەشدار بوو.

پەیوەست بە ناوەڕۆکی خولەکەش، ئەوا خولەکە دەیان دانیشتنی ڕاهێنانی لەخۆگرت کە بە نۆرە لە نێوان کۆمەڵەی نیشتمانی و ئەنجومەنی پیراندا ڕێکخران و تیشکیان خستە سەر  ئاشنابوون بە سیستەمی پەرلەمانیی دوو ئەنجومەنی لە فەرەنسا و میکانیزمەکانی دانیشتنە گشتییەکان و بەڕێوەبردنی گفتوگۆکان،ئەمە جگە لەوەی ئیتیک و ڕەوشتی پەرلەمانیو ئامرازەکانی چاودێریکردنی کارەکانی حکومەت بەشێکی دیکەی خولەکەی پێکدەهێنا.

هاوکات،د. فوئاد ئەحمەد، ڕاوێژکار و بەڕێوەبەری سەنتەری توێژینەوەی پەرلەمانی کوردستان، سیمینارێکی پێشکەش کرد و تێیدا ڕوونی کردەوە کە پەرلەمانی کوردستان چۆن تەکنەلۆژیای نوێی لە کاری یاسادانان و بەهێزکردنی دەستگەیشتنی هاووڵاتییان بە زانیارییە پەرلەمانییەکان و کەناڵەکانی پەیوەندی لەگەڵ پەرلەمانتاران بەکار خستووە، هەروەها نوێنەری پەرلەمانی کوردستان بەشداربوو لە گفتوگۆکاندا و تیشکی خستە سەر ڕەوتی کاری پەرلەمانی لە هەرێمی کوردستان لە ماوەی 30 ساڵی ڕابردوودا.

ئەمەش لەکاتێکدایە، ئەم خولە لە چوارچێوەی بەرنامەیەکی ڕاهێناندا دێت کە ساڵی 2009 دەستیپێکردووە، هاوتەریب لەگەڵ وەشانی فەرەنسییەکەیدا کە لە ساڵی 1995ـەوە دەستیپێکردووە. لە سەرەتای دامەزراندنیەوە تا ئێستا میوانداریی زیاتر لە 175 پەرلەمانتار و فەرمانبەری پەرلەمانیی لە زیاتر لە 25 وڵات کردووە.

PUKMEDIA