یەکێتی بۆ پێکهێنانی حکومەتی خۆجێی کەرکوک سەردانی لایەنەکان دەکات

PUKMEDIA

شاری کەرکوک

یەکێتیی نیشتمانیی کوردستان لە کەرکوک، گەڕێکی دیکەی سەردانی بۆ لای حزب و لایەنە سیاسییە کوردستانییەکانی شارەکە دەستپێکردووە و لەوچوارچێوەیەشدا ئەمڕۆ ١٥-١-٢٠٢٤ وەفدێکی مەڵبەندی کەرکوک سەردانی حزبی زەحمەتکێشانی کوردستان و بزوتنەوەی گۆڕان و بزوتنەوەی ئیسلامی و یەکگرتووی ئیسلامی لەشارەکە دەکات، کە ئامانج لێی گفتوگۆکردنە لەبارەی پێکهێنانی حکومەتی خۆجێی کەرکوک و بەشداریکردنی کورد بەیەکدەنگ لە پێکهێنانی ئەنجومەنی پارێزگاکەدا.

یەکێتی لەکەرکوک یەکخستنی نێوماڵی کوردی دەوێت 

رەوەند مەلا مەحمود لێپرسراوی مەڵبەندی کەرکوکی یەکێتیی نیشتمانیی کوردستان بەسایتی رەسمی یەکێتی PUKMEDIA ی رایگەیاند: "سەردانمان بۆ لای لایەنەکان لە چوارچێوەی ئەو کۆبوونەوانەدا دێت کە بڕیاربوو لەدوای هەڵبژاردنی ئەنجومەنی پارێزگاکانی عیراق یەکێتی سەردانی سەرجەم لایەنە کوردسانییەکان بکەین".

"جگە لە لایەنە کوردستانییەکان وەک یەکێتی سەردانی پێکهاتەکانیش دەکەین، بەڵام دەمانەوێت سەرەتا نێوماڵی کورد یەکبخەین و پاشانیش بەیەکدەنگی کورد لەگەڵ پێکهاتەکان بکەوینە گفتوگۆوە، چونکە وەک یەکێتی نامانەوێت هیچ پێکهاتەیەک فەرامۆش بکرێت"، رەوەند مەلا مەحمود وایوت.

یەکێتی و پارتی لەکەرکوک پێکەوە کاردەکەن

هەفتەی رابردووش هەمان وەفدی یەکێتی وەک یەکەم حزبی کوردستانی سەردانی پارتی دیموکراتی کوردستانی کرد و هەردوولایان هاوڕابون لەسەر ئەوەی کە سەرەتا نێوماڵی کورد یەکبخەن و هیچ پێکهاتەیەک لە کەرکوک فەرامۆش نەکەن پێکەوە لەشارەکەدا کار بکەن.

بەپێی ئەنجامی کۆتایی هەڵبژاردنی ئەنجومەنی پارێزگاکانی عیراق کەلەلایەن کۆمسیۆنەوە راگەیەندرابوو، یەکێتیی نیشتمانیی کوردستان لە چوارچێوەی هاوپەیمانی کەرکوک هێز و ئیرادەمانە لەگەڵ حزبی شیوعی کوردستان لە پارێزگای کەرکوک توانی زۆرترین دەنگ بەدەستبهێنێت و ببێتە خاوەنی ٥ کورسی ئەنجومەنی پارێزگاکە، لەوڕوانگەیەشەوە وەک حزبی یەکەم لەشارەکە سەردانی بۆلای لایەنە کوردستانییەکان دەستپێکردووە بۆ یەکدەنگی و یەکهەڵوێستی کورد لەپێکهێنانی حکومەتی خۆجێی لەشارەکە.
PUKMEDIA