داوایەکی یەکێتی بۆ ئارامی کەرکوک جێبەجێدەکرێت

PUKMEDIA

پۆلیسی ناوخۆیی کەرکوک

داواکارییەکی فراکسیۆنی یەکێتی لەبەغدا بۆ ئارامی زیاتری کەرکوک دەکەوێتە بواری جێبەجێکردنەوە و ئەمنییەت و ئارامی شارەکە بە پۆلیسی ناوخۆیی دەسپێردرێت.

سەباح حەبیب ئەندامی فراکسیۆنی یەکێتی لە ئەنجومەنی نوێنەرانی عیراق لەپشکی کەرکوک بە سایتی رەسمیی یەکێتیی نیشتمانیی کوردستان PUKMEDIA ی راگەیاند:" لەگەڵ ئەوەی چەند جارێک وەک فراکسیۆنی یەکێتی لە بەغدا داوامان کردبوو دۆسیەی ئەمنی پارێزگای کەرکوک بە پۆلیسی ناوخۆیی شارەکە بسپێردرێت، ئەمڕۆ بڕیاردرا ئەرکی بەرپرسیارێتی ئارامی شارەکە بەپۆلیس بدرێت".

"پۆلیسی ناوخۆیی جگە لەوەی سەرجەم پێکهاتەکانی تێدایە، هەروەها دەستوەردانی قەومی تێدا نییە و پێمان وایە دەتوانێت بەرپرسیارییەتی ئەو ئەرکە وەربگرێت"، سەباح حەبیب وایوت.

ئەو ئەندامەی فراکسیۆنی یەکێتی لە ئەنجومەنی نوێنەرانی عیراق وتیشی:"بەوپێیەی پۆلیسی کەرکوک شارەزایی تەواوی لەسەر ئارامی و ئەمنیەتی شارەکە هەیە، سەرجەم پێکهاتەکانی کەرکوکیش پشتیوانیان دەکەن و وەک هێزێکی نیشتمانی لێیان دەڕوانن، لەم روانگەیەشەوە بڕیاری بەرپرسیارێتی ئەمنی شارەکە کە بە پۆلیس سپێردراوە بە بڕیارێکی دروست دەزانن".

PUKMEDIA