دەبێ پێکهاتەکان خۆیان بڕیاردەری خۆیان بن

د. مەجید محەمەدئەمین ئەندامی سەرکردایەتی یەکێتی

دکتۆر مەجید محەمەدئەمین*

کلتوری پێکەوەژیان و لێبوردەیی و هاریکاری و هاوکاری پێکهاتە نەتەوەیی و ئایینیەکانی کوردستان ، باوەڕێکی قوڵ و فەرهەنگێكی بنچینەیی سیاسەتی نەگۆڕی یەکێتیی نیشتمانیی کوردستان و لەبنەڕەتیشدا ، باوەڕو هزری سەرۆك مام جەلال بووە .

ڕێزگرتن و پارێزگاریکردن لەمانەوەو بەهێزکردنی كلتورو دابونەریتە جیاوازەکانی تورکمان و کلدۆئاشورو سریان و ئەرمەن و هەموو بیروباوەڕە ئایینیەکانی کوردستان ، هێزی زیاترو پێگەی بەرزتریش بەهەرێمی کوردستان دەبەخشێت .

دانانی پڕۆگرامی پەروەردەو خوێندن بەزمانی دایك و  کورسی کۆتای  پێکهاتەکان ، بیرۆکەو داوای سەرۆك مام جەلال بووە لەساڵی 1992 ،  بۆیە لەهەموو کۆڕو کۆبونەوەکانیشیدا ، هەمیشە دووپاتی دەکردەوە ، کە هاوکاری و پشتیوانی لەداواو داخوازیەکانی خوشك و برایانی تورکمان و کلدۆئاشورو سریانەکان دەکات ، بۆ ئەوەیە کە خۆیان نوێنەری خۆیان بن و وەکو خۆیان بیربکەنەوەو بڕیار چارەنوس و کاروباری خۆیان بدەن .

بێگومان یەکێتیی نیشتمانیی کوردستان بەدرێژایی مێژووی خۆی و بەگیانی بەرزی نیشتمانییەوە هەموو کات بەدەم داواو داخوازیەکانی نوێنەرو هێزە سیاسیەکانی پێکهاتەکان هاتووە ، لەبەرامبەر هاوکاری و پشتیوانەکانیەکانیشیدا ، هەرگیز پێکهاتەکان و نوێنەرەکانیانی بەکار نەهێناوە بۆ جێبەجێکردنی سیاسەتە حزبیەکانی خۆی . یەکێتیی هەموو کاتێکیش دژی هەراسانکردن و داگیرکردنی گوندو  زەویە کشتوکاڵیەکانیان بووە بەتایبەت لەبادینان و دەشتی نەینەواو دەڤەری ئێزیدخان ، کەتا ئێستاش بەردەوامە .

هەوڵی جددیش دەدەین کلتوری  لێبوردەیی و پێکەوەژیان و هاوبەشیمان لەگەڵ پێکهاتەکانی کوردستان ، بخەینە ناو پڕۆگرامەکانی پەروەردەو خوێندن ، بۆ ئەوەی نەوەکانی داهاتووشمان لەسەر ئەم گیانی پێکەوەییە پەروەردە بکەین .

بۆیە دووپاتی دەکەینەوە ، کە یەکێتیی بۆ هەمیشە هاوکارو پشتیوانی پێکهاتەکان دەبێت ، لەپێناوی ئەوەی  خۆیان نوێنەری خۆیان بن و وەکو خۆیان بیربکەنەوە ،  نەوەك ببنە جێبەجێکاری ئەجێندای سیاسەتی ناشیرینی لایەنی تر .

*ئەندامی سەرکردایەتی یەکێتیی نیشتمانیی کوردستان

PUKMEDIA