به‌یاننامه‌یه‌ك ئاڕاسته‌ی حكومه‌ت و لایه‌نه‌ سیاسییه‌كان ده‌كرێت

.

180 رێكخراو و كه‌سایه‌تی له‌به‌یاننامه‌یه‌كدا داوا له‌حكومه‌ت و لێپرسراوانی هه‌رێم ده‌كه‌ن هه‌نگاوی كرداری و خێرا بۆ چاره‌سه‌ركردنی ئه‌و قه‌یران و كێشانه‌ بنێن كه‌ ماوه‌یه‌كی زۆره‌ به‌رۆكی هه‌رێمی كوردستانی گرتووه‌.

ئه‌مڕۆ 3-10-2015 نوێنه‌ری 180 رێكخراوی كۆمه‌ڵی مه‌ده‌نی و كه‌سایه‌تی له‌شاری سلێمانی و له‌كۆنگره‌یه‌كی رۆژنامه‌وانیدا هه‌ڵوێستی خۆیان له‌باره‌ی قه‌یران و ناكۆكییه‌ سیاسییه‌كان ده‌ربڕی و له‌به‌یاننامه‌یه‌كدا كه‌ ئاڕاسته‌ی حكومه‌ت و په‌رله‌مان و لایه‌نه‌ سیاسییه‌كانی كوردستانیان كرد، داوایانكرد په‌له‌بكرێت له‌چاره‌سه‌ركردنی قه‌یران و كێشه‌كان، چونكه‌ گرفتی گه‌وره‌یان له‌به‌رده‌م ژیانی خه‌ڵكی كوردستان دروستكردووه‌.

له‌كۆنگره‌یه‌كی رۆژنامه‌وانیشدا، شڤان زه‌نگه‌نه‌ سه‌رۆكی رێكخراوی سكاڵاو چاودێری به‌نوێنه‌رایه‌تی رێكخراوه‌كان رایگه‌یاند: به‌پێویستمانزانی له‌م بارودۆخه‌ دژواره‌ی كه‌ ماوه‌یه‌كه‌ هه‌رێمی كوردستان پێدا تێپه‌ڕده‌بێت هه‌ڵوێستی خۆمان بخه‌ینه‌ڕوو.

وتیشی: ئه‌م هه‌وڵه‌مان فشارێكی به‌هێز ده‌بێت بۆئه‌وه‌ی حكومه‌ت و دامه‌زراوه‌كانی تر هه‌نگاوبنێن بۆ چاكسازی و باشكردنی ژیانی خه‌ڵكی كوردستان و تێپه‌ڕاندنی ئه‌و قه‌یرانانه‌ی كه‌ ماوه‌یه‌كی زۆره‌ به‌رۆكی هه‌رێمی كوردستانی گرتووه‌.

راشیگه‌یاند: له‌به‌یاننامه‌كه‌ماندا پاڵپشتی خۆمان بۆ خۆپیشاندانی فه‌رمانبه‌ران ده‌ربڕیوه‌و داواشمان له‌لایه‌نه‌ سیاسییه‌كان كردووه‌ كۆتایی به‌ململانێی سیاسی بهێنن و پرسی سه‌رۆكایه‌تی هه‌رێم یه‌كلایی بكه‌نه‌وه‌.

شڤان زه‌نگه‌نه‌ وتیشی: ئه‌گه‌ر حكومه‌ت و په‌رله‌مان و لایه‌نه‌ سیاسییه‌كان نه‌یه‌ن به‌ده‌نگ داواكاریه‌كانمانه‌وه‌، له‌چه‌ند رۆژی داهاتوودا كارده‌كه‌ین بۆ ئه‌نجامدانی خۆپیشاندانێكی سه‌رتاسه‌ری له‌هه‌رێمی كوردستان.

PUKmedia تایبه‌ت