چاكسازییەكان و بەهێزكردنی بنیادی دەوڵەت گفتوگۆی لەبارەوەكرا

هەر سێ سەرۆكایەتییەكە كۆبوونەوە

هەر سێ‌ سەرۆكایەتیی كۆمار و ئەنجومەنی وەزیران و ئەنجومەنی نوێنەران كۆبوونەوە و دۆخی ئەمنیی و هەنگاوەكانی چاكسازییان تاوتوێكرد
ئەمڕۆ 31 -8-2015، فوئاد مەعسوم سەرۆك كۆمار و حەیدەر عەبادی سەرۆك وەزیران و سەلیم جبوری سەرۆكی ئەنجومەنی نوێنەران لە كۆشكی سەلام لە بەغدا  كۆبونەوە.

لەو كۆبونەوەیەدا گفتوگۆكرا لەبارەی دۆخی ئەمنی و دۆسییەی چاكسازییەكان و شێوازیی بەهێزكردنی بنیادنانی دەوڵەت و ئەو مەسەلانەی پەیوەستن بە جێبەجێكردنی مەسەلە یاساییەكان.

ئامادەبوان پشتیوانی خۆیان بۆ هەنگاوە كردارییەكان دەربڕی كە بەرژەوەندی گەلی عیراق زامن دەكات و ئەو چاكسازییە حكومیی و پەرلەمانییەش بەدی دێنێت كە دەنگی لەسەر دراوە .

سەرۆك وەزیرانی تەئكیدیكردەوە لەسەر پێویستی بەرەوپێشبردن و جێبەجێكردنی هەموو چاكسازییەكان بەگوێرەی دەستور و یاسا.

هەر لەو كۆبونەوەیەدا ستایشی ئەو  ئۆپەراسیۆنە سەربازییانە كرا كە سوپای عیراق و دەزگا ئەمنی و رۆڵەكانی حەشدی شەعبی و پێشمەرگە و رۆڵەكانی عەشایەری ئەنبار و بێجی و تەواوی ناوچەكانی عێراق بەڕێوەی دەبەن.

ئامادەبوانی كۆبونەوەكە بەبایەخەوە باسیان لە گرنگی پەسەندكردنی قانونە سەرەكییەكان كرد لەوانەش قانونی پاسەوانی نیشتمانیی و دادگای ئیتحادی و ئاشتبونەوەی گشتی.

هەر وەك بەشداربوانی كۆبونەوەكە تەئكیدیانكردەوە لەسەر لایەنی ئابووری و دارایی و بە پێشینەی كارەكانی لایەنی جێبەجێكار و پەرلەمانیان دانا بۆ بەرەوپێشبردنی چاكسازییەكان , دوپاتیشیان كردەوە لەسەر دابینكردنی خزمەتگوزارییە پێویستەكان بۆ هاوڵاتیان كە لە چوارچێوەی ئەو ئەركە بنەڕەتییانە دێت كە پێویستە  دامەزراوەكانی دەوڵەت جێبەجێیان بكات.

PUKmedia