له‌ باره‌ی هه‌ڵه‌بجه‌وه‌ ...

هیمان رمزی

له‌ باره‌ی هه‌ڵه‌بجه‌وه‌.. پێشنیازێك بۆ سه‌رۆكایه‌تی هه‌رێم
هیمان رمزی
دواجار هه‌ڵه‌بجه‌ییه‌كان بوونه‌ خاوه‌نی ئه‌نجومه‌نی پارێزگای خۆیان و كۆتایی به‌و ململانێیه‌ هات كه‌ له‌ نیسانی 2014ه‌وه‌ سه‌باره‌ت به‌ پرسی پارێزگاكان هاتبووه‌ ئاراوه‌. ئه‌وه‌ی گرنگه‌ ئێستا هه‌ڵه‌بجه‌ به‌ فه‌رمی پێنجه‌م پارێزگای كوردستان و 19ه‌هه‌مینی عێراقه‌، به‌ڵام له‌ ناو نه‌خشه‌ی عێراق و كوردستان به‌ گشتی و لۆگۆی سه‌رۆكایه‌تی هه‌رێمی كوردستان هیچ ئاماژه‌یه‌كی بۆ دانه‌نراوه‌.
به‌ هۆی ئه‌وه‌ی سه‌رۆكایه‌تی هه‌رێمی كوردستان، دامه‌زراوه‌یه‌كی سیاسی و سیادی و ئیداری و به‌رزترین ده‌سه‌ڵاتی جێبه‌جێكردنه‌ له‌ كوردستان و نوێنه‌رایه‌تی شه‌رعی و قانوونی هه‌رێمی كوردستان ده‌كات، گرنگه‌ له‌ لۆگۆكه‌یدا ئایكۆنێكی تایبه‌ت به‌ هه‌ڵه‌بجه‌ ده‌ستنیشان بكات.
ئه‌گه‌ر سه‌یری درووشم و لۆگۆی سه‌رۆكایه‌تی هه‌رێمی كوردستان بكه‌ین ده‌بینین هه‌موو پێكهاته‌ و پارێزگاكانی هه‌رێمی كوردستان تێییدا ره‌نگیان داوه‌ته‌وه‌ و ته‌نانه‌ت هێماشی تێدایه‌ بۆ زمانه‌ فه‌رمییه‌كان.
با به‌ وردی سه‌رنجی لۆگۆی سه‌رۆكایه‌تی هه‌رێمی كوردستان بده‌ین و كۆی هێما و ئه‌و ئایكۆنانه‌ی تێیدا به‌كار هاتوون بیانناسێنن، ئه‌و كاته‌ ده‌زانیین چه‌نده‌ بۆشایی هه‌ڵه‌بجه‌ی تێدایه‌.
درووشمی سه‌رۆكایه‌تی هه‌رێم بریتییه‌ له‌ هه‌ڵۆیه‌كی باڵ كراوه‌ له‌ناو بازنه‌یه‌ك كه‌ رووه‌كه‌ی به‌ ئاڵای كوردستان نه‌خشێنراوه‌.
1- هه‌ڵۆیه‌كه‌ به‌ گشتی نیشانه‌ی هێزو سه‌ربه‌رزی و ئازادپه‌روه‌ری نه‌ته‌وه‌ی كورد و مێژووه‌ دێرینه‌كه‌یه‌تی.
2- ره‌نگه‌ زێڕینه‌كه‌ نیشانه‌ی ده‌وڵه‌مه‌ندی كوردستانه‌ به‌ سه‌روه‌ت و سامانی سروشتی.
3- چوار به‌شه‌كانی هه‌ر باڵێكی هه‌ڵۆیه‌كه‌ نیشانه‌ی چوار پارێزگاكانی كوردستانن.
4- هه‌تاوه‌كه‌ نیشانه‌ی هه‌ڵهاتنه‌وه‌ی شارستانییه‌تی دێرینی كوردستانه‌ وبیست و یه‌ك تیشكه‌كانی ئاماژه‌ن بۆ جه‌ژنی نه‌ورۆز كه‌ سه‌ری ساڵی تازه‌ی كوردییه‌ له‌ 21 ئازارو چوار تیشكه‌ سه‌ره‌كییه‌كانیش نیشانه‌ی هه‌رچوار پێكهاته‌كانی كوردستانن – كوردو توركمان وكلدان و ئاشور.
5- دوو ئه‌ستێره‌كانی سه‌ر بازنه‌كه‌ كه‌ یه‌كێكیان له‌لای راستی هه‌لۆیه‌كه‌و، ئه‌وه‌ی دیكه‌یان له‌ لای چه‌پییه‌وه‌، چه‌سپێندراون ، ئاماژه‌ن بۆ كوردو عه‌ره‌ب وه‌ك دوو نه‌ته‌وه‌ی سه‌ره‌كی عیراق.
6- له‌ سه‌ره‌وه‌ی بازنه‌كه‌ به‌ زمانی كوردی نوسراوه‌ (سه‌رۆكایه‌تی هه‌رێمی كوردستان ) و له‌ خواره‌وه‌شی به‌زمانی عه‌ره‌بی ( رئاسه‌ اقلیم كوردستان).
كه‌واته‌ ئه‌وه‌ی پێویسته‌ هه‌بێت ئاماژه‌یه‌كی روونه‌ بۆ بوونی پێنجه‌م پارێزگای كوردستان و له‌به‌رچاوگرتنی تایبه‌تمه‌ندی ئه‌و پارێزگایه‌ له‌ هه‌ڵبژاردنی ئایكۆنێك بۆ سه‌ر لۆگۆكه‌. كه‌ بێگومان دانانی ئه‌و ئایكۆنه‌ له‌سه‌ر لۆگۆكه‌ گرنگی خۆی ده‌بێت له‌ پاراستنی یه‌كپارچه‌یی خاكی هه‌رێمی كوردستان و له‌به‌ر چاوگرتنی پێگه‌ی هه‌ڵه‌بجه‌ له‌ نه‌خشه‌ی كوردستاندا.
لێیره‌وه‌ به‌ پێویستی ده‌زانم ئه‌م پێشنیازه‌ بخه‌مه‌ به‌رچاوی لایه‌نه‌ په‌یوه‌ندیداره‌كان و هه‌قیش وایه‌ ئه‌نجومه‌نی پارێزگا و خودی پارێزگاری هه‌ڵه‌بجه‌ به‌ نوسراوی فه‌رمی داوا له‌ سه‌رۆكایه‌تی هه‌رێم بكه‌ن ئه‌و پرسه‌ چاره‌سه‌ر بكات.
به‌ هیوای ئه‌وه‌ی هه‌موو زمان و پێكهاته‌و ئاین و پارێزگاكانی كوردستان له‌ لۆگۆ و درووشمه‌كانی هه‌رێمی كوردستاندا ره‌چاوی ماف و ئیراده‌یان بكرێت و هه‌مووان خۆیان له‌و لۆگۆ و درووشماندا ببیننه‌وه‌ به‌ تایبه‌تی لۆگۆی سه‌رۆكایه‌تی هه‌رێمی كوردستان كه‌ دامه‌زراوه‌یه‌كی سیادییه‌و په‌یوه‌سته‌ به‌ ژیانی هه‌موومانه‌وه‌.