نه‌رویج راهێنه‌ری سه‌ربازی ره‌وانه‌ی هه‌رێم ده‌كات

هاوشانی راهێنه‌ره‌ ئه‌ڵمانیه‌كان مه‌شق به‌پێشمه‌رگه‌ ده‌كه‌ن

وه‌زاره‌تی به‌رگری نه‌وریج ئه‌مڕۆ چوار شه‌ممه‌ 1-4-2015 ره‌وانه‌كردنی 50 راهێنه‌ری سه‌ربازی بۆ مه‌شقكردن به‌ هێزه‌كانی پێشمه‌رگه‌ بۆ روبه‌ڕوبونه‌وه‌ی گروپی تیرۆرستی داعش  ره‌وانه‌ی هه‌رێم ده‌كات.

ئیستاین كوارفینگ وته‌بێژی ره‌سمی وه‌زاره‌تی به‌رگری نه‌وریج به‌ئاژانسه‌كانی نه‌وریجی راگه‌یاندوه‌: وڵاته‌كه‌ی 50 راهێنه‌ری سه‌رباز و ئه‌فسه‌ر له‌ كه‌تیبه‌ی پیاده‌ی نمونه‌ی ره‌وانه‌ی هه‌ولێری پایته‌ختی هه‌رێمی كوردستان ده‌كه‌ن و هاوشانی ئه‌فسه‌رو راهێنه‌ره‌ سه‌ربازیه‌كانی ئه‌ڵمانیا مه‌شق به‌هێزه‌كانی پێشمه‌رگه‌ ده‌كه‌ن.

وته‌بێژی ره‌سمی وه‌زاره‌تی به‌رگری نه‌وریج ئاماژه‌ی به‌وه‌شداوه‌: له‌كۆتاییه‌كانی مانگی نیشان ئه‌و راهێنه‌رو ئه‌فسه‌رانه‌ ره‌وانه‌ی هه‌ولێر ده‌كرێن و له‌هه‌مان كاتیشدا نه‌رویج به‌رنامه‌ی هه‌یه‌ ده‌یان راهێنه‌ر و ئه‌فسه‌ری تر ره‌وانه‌ی به‌غدا بكات.

جێی باسه‌ وڵاتی نه‌رویج ئه‌مه‌ بۆ دووه‌مینجاره‌ راهێنه‌ر و ئه‌فسه‌ری سه‌ربازی ره‌وانه‌ی به‌غدا و هه‌رێم ده‌كات كه‌ وه‌جبه‌ی یه‌كه‌م 120 ئه‌فسه‌ر و سه‌ربازی ره‌وانه‌ی به‌غدا كردبوو.

PUKmedia  وه‌رگێڕانی / سامان یاروه‌یس