كۆسره‌ت ره‌سوڵ: یه‌كێتی له‌ به‌ره‌نگاری و به‌رگری سه‌رقافڵه‌ی به‌رخودانه‌

.

له‌ دیدارێكیدا  كۆسره‌ت ره‌سوڵ عه‌لی جێگری سكرتێری گشتی (ی.ن.ك) له‌ گه‌ڵ سكرتێر و جێگران و لێپرسراوی کۆمسیۆنەکانی ئه‌نجومه‌نی ناوه‌ندی (ی.ن.ك) كۆبوه‌وه‌.
له‌ كۆبونه‌وه‌كه‌دا چه‌ندین ته‌وه‌ری گرنگی ناوخۆیی و كوردستانی و ئیقلیمی گفنوگۆی له‌باره‌وه‌ كرا.
سه‌ره‌تا جێگری سكرتێری گشتی (ی.ن.ك) سه‌باره‌ت به‌بارودۆخی ناوخۆیی و ئه‌و ته‌نگژه‌ و قه‌یرانه‌ی ناویه‌كێتی نیشتمانی كوردستانی بێدا گوزه‌ر ده‌كات ووتی: یه‌كێتی حزبی شه‌هیدان و كادر و ئه‌ندامه‌ دڵسۆزه‌كانێتی و موڵكی تایبه‌تی هیچ كه‌س و لایه‌نێك نیه‌، ئێمه‌ هه‌ر له‌ سه‌ره‌تاوه‌ له‌سه‌ر بیر و ڕا و دید و بۆچونی هه‌مه‌ لایه‌نه‌ی جۆراو جۆری دیموكراسی دروست بوین و ئه‌وه‌ش خزمه‌تێكی زۆری گه‌شه‌كردن و به‌هێزیی و مانه‌وه‌مانی كردووه‌..   بۆیه‌ ئاساییه‌ له‌سه‌ر پرسه‌ جیاجیاكان دیدو بۆچونی جیاوازمان هه‌بێت، گرنگ مانه‌وه‌ی (ی.ن.ك) ه‌، ئه‌م كێشانه‌ی ئێستامان ئاماژه‌ی لێكترازان و جیابونه‌وه‌ نیه‌، به‌ڵكو مێژووی یه‌كێتی پێمان ده‌ڵێت : ئێمه‌ له‌ جیاوازییه‌كانماندا گه‌شه‌ی زیاترمان كردووه‌ ، چونكه‌ به‌تێكڕا كۆكین له‌سه‌ر هێشتنه‌وه‌ی یه‌كێتی ناو یه‌كێتی و مانه‌وه‌ی حزبی شه‌هیدان به‌ یه‌كگرتوویی و به‌هێزی.
له‌ دریژه‌ی وته‌كانیدا كۆسره‌ت ره‌سوڵ عه‌لی ووتی: من به‌ڵێنتان ده‌ده‌می چۆن له‌ ڕۆژه‌ سه‌خته‌كاندا یه‌كێتی ناویه‌كێتیم پاراستووه‌ له‌م ته‌نگژه‌یه‌شدا هه‌مان ئه‌و پێشمه‌رگه‌یه‌بم بۆ مانه‌وه‌ی یه‌كێتی دڵنیاتان ده‌كه‌مه‌وه‌ من ته‌ره‌فی هیچ كه‌س و ته‌كه‌تولێك نیم  و به‌رده‌وامیش ده‌بم له‌ چاكسازییه‌كانی ناو یه‌كێتیدا ، هه‌تا یه‌كێتی ده‌كه‌ینه‌وه‌ پێشه‌نگ و دیموكراسی و به‌رخۆدان و مقاوه‌مه‌ت.
هه‌روه‌ها كۆسره‌ت ره‌سوڵ ووتی: له‌م ساته‌وه‌خته‌دا یه‌كێتی له‌ به‌ره‌نگاری و به‌رگری له‌ خاكی كوردستاندا سه‌رقافڵه‌ی به‌رخودانه‌و له‌ لایه‌نی جه‌ماوه‌ریشه‌وه‌ له‌ چڵه‌ پۆپه‌ی گه‌شه‌كردندایه‌.
پاشان هه‌ڤاڵ عادل مراد سكرتێری ئه‌نجومه‌نی ناوه‌ندی (ی.ن.ك)  ڕۆڵ و كاریگه‌ری كۆسره‌ت ره‌سوڵی به‌رز نرخاند له‌ سه‌ركردایه‌تی كردن و سه‌رپه‌رشتی كردنی هێزی پێشمه‌رگه‌ی كوردستان له‌ شه‌ڕی به‌ره‌نگاربونه‌وه‌ی تیرۆریستانی داعشدا و گووتی: ئێوه‌ چۆن ڕه‌مزی مقاوه‌مه‌ت و به‌رگری و قاره‌مانێتین له‌ جه‌نگی دژه‌تیرۆردا ، ئێمه‌ له‌ چاره‌سه‌ركردنی كێشه‌كانی (ی.ن.ك) یشدا به‌گوێره‌ی په‌یڕه‌وه‌ی ناوخۆی ( ی.ن.ك) داوات لێده‌كه‌ین: ڕۆڵی كاریگه‌ر و یه‌كلاكه‌ره‌وه‌ت هه‌بێت ، پێویسته‌ چۆن هه‌ڤاڵ مام جه‌لال موڵكی هه‌موو یه‌كێتیه‌كان بوو، كۆسره‌ت ره‌سوڵیش موڵكی سه‌رجه‌م یه‌كێتییه‌كانه‌ و پێشره‌ومانه‌ له‌چاره‌سه‌ر كردنی ته‌گژه‌و قه‌یرانه‌كانی (ی.ن.ك) دا.
جێگری سكرتێری گشتی به‌ڵێنی پێدان كه‌باودۆخه‌كه‌ رووه‌ و ئاسایی بونه‌وه‌ و چاره‌سه‌ر ده‌چێت، له‌ دوای كۆتایی هاتنی كاری لیژنه‌كانیش كۆبونه‌وه‌كان ده‌ست پێده‌كه‌ینه‌وه‌.

PUKmedia راگه‌یاندنی جێگری سكرتێری گشتی