نێچیرڤان بارزانی و داوود ئۆغلو هاوڕابوون له‌سه‌ر بره‌ودان به‌په‌یوه‌ندییه‌كان

تاوتوێكردنی په‌یوه‌ندییه‌كانی هه‌رێمی كوردستان و توركیا به‌شێكی دیكه‌ی كۆبوونه‌وه‌كه‌ بوو

پێشنیوه‌ڕۆی ئه‌مڕۆ هه‌ینی  19 ی دیسه‌مبه‌ری 2014، نێچیرڤان بارزانی سه‌رۆك وه‌زیرانی هه‌رێمی كوردستان له‌ئیستانبوڵ له‌لایه‌ن ئه‌حمه‌د داوود ئۆغلو سه‌رۆك وه‌زیرانی توركیاوه‌ پێشوازی لێكرا.

له‌ كۆبوونه‌وه‌یه‌كدا بارودۆخی ئێستای عیراق و ناوچه‌كه‌ و پێشهاته‌ سه‌ربازییه‌كان و شه‌ڕی دژی تیرۆر و ئه‌و سه‌ركه‌وتن و به‌ره‌وپێشچوونانه‌ی ئه‌م رۆژانه‌ له‌لایه‌ن پێشمه‌رگه‌ی كوردستانه‌وه‌،‌ له‌ ناوچه‌كانی زوممار و ده‌وروبه‌ری شه‌نگال به‌ ده‌ست هاتوون، تاوتوێكران و باس له‌پێشڕه‌وه‌ییه‌ به‌رده‌وامه‌كانی پێشمه‌رگه‌ و كۆنترۆڵكردنه‌وه‌و ده‌رهێنانی ئه‌و شوێنانه‌ له‌ده‌ستی داعش كرا.

له‌ به‌شێكی دیكه‌ی كۆبوونه‌وكه‌دا، دوایین ڕێككه‌وتنی نێوان هه‌ولێر و به‌غدا خرایه‌ به‌ر باس و داوود ئۆغلو وێڕای ده‌ربڕینی خۆشحاڵی خۆی به‌و رێككه‌وتنه‌، ده‌ستخۆشی له‌ هه‌ردوولا كردو هیوای خواست ئه‌م رێككه‌وتنه‌ كه‌ به‌شێك له‌كێشه‌كانی هه‌ولێر و به‌غدا چاره‌سه‌ر ده‌كات، ببێته‌ هانده‌رێك بۆ ئه‌وه‌ی هه‌موو كێشه‌كانی نێوان هه‌رێمی كوردستان  و حكومه‌تی عیراق، چاره‌سه‌ر بكرێن.

تاوتوێكردنی په‌یوه‌ندییه‌كانی هه‌رێمی كوردستان و توركیا به‌شێكی دیكه‌ی كۆبوونه‌وه‌كه‌ بوو، كه‌ تیایدا هه‌ردوولا داكۆكییان له‌سه‌ر بره‌ودانی زیاتر و فراوانكردنی بواره‌كانی په‌یوه‌ندییه‌كان كرده‌وه‌ و كۆك بوون له‌سه‌ر ئه‌وه‌ی كه‌ به‌رده‌وامیی سه‌ردان و دیداره‌كان له‌ نێوان هه‌دوولادا، بۆ ئاڵوگۆڕی بیروڕا و تێڕوانینی هه‌دوولا له‌سه‌ر پرسه‌كان و پته‌وكردنی په‌یوه‌ندییه‌كان، هاوكار ده‌بێت.

PUKmedia راگه‌یاندنی سه‌رۆكایه‌تی حكومه‌ت