مه‌كته‌بی سیاسی: یه‌كریزی كورد مایه‌ی شانازیمانه‌

به‌رامبه‌ر تیرۆرستان یه‌ك ده‌نگ و یه‌كریزین

پێشنیوه‌ڕۆی ئه‌مڕۆ (25/10/2014)، هه‌ڤاڵان كۆسره‌ت ره‌سوڵ عه‌لی، جێگری یه‌كه‌می سكرتێری گشتی و مه‌لا به‌ختیار، لێپرسراوی ده‌سته‌ی كارگێڕی، به‌ئاماده‌بوونی هه‌ڤاڵان ئه‌ندامانی ده‌سته‌ی كارگێڕی و ژماره‌یه‌ك له‌هه‌ڤاڵانی مه‌كته‌بی سیاسی و سه‌ركردایه‌تی، پێشوازیان له‌وه‌فدێكی ئه‌نجومه‌نی نیشتمانیی كوردی سوریا و وه‌فدی خۆبه‌ڕێوه‌به‌رێتی رۆژئاوای كوردستان كردو له‌كۆبوونه‌وه‌یه‌كیشدا، گفتوگۆو بیروڕای پێویست سه‌باره‌ت به‌و رێككه‌تنامه‌یه‌ ئاڵوگۆڕ كرا، كه‌ له‌شاری دهۆك، له‌نێوان هێزو لایه‌نه‌كانی رۆژئاوای كوردستان ئه‌نجامدرا، كه‌ ئامانج لێی جه‌ختكردنه‌وه‌یه‌ له‌یه‌كڕیزی و یه‌ك هه‌ڵوێستی هێزو لایه‌نه‌ سیاسیه‌كانی رۆژئاوای كوردستان.

له‌سه‌ره‌تای كۆبوونه‌وه‌كه‌شدا، هه‌ڤاڵ كۆسره‌ت ره‌سوڵ عه‌لی، جێگری یه‌كه‌می سكرتێری گشتی، به‌ناوی مه‌كته‌بی سیاسی و سه‌ركردایه‌تی یه‌كێتیی نیشتمانیی كوردستانه‌وه‌، به‌خێرهاتنی كردن و ئاماژه‌ی بۆ ئه‌وه‌كرد، هیچ جیاوازییه‌ك له‌نێوان به‌شه‌كانی  كوردستاندا نییه‌و ته‌نها جیاوازی له‌نێوانماندا ئه‌وه‌یه‌ كه‌ دابه‌شكراوین، بۆیه‌ پێویسته‌ له‌ئێستادا نه‌ته‌وه‌كه‌مان له‌به‌رامبه‌ر ئه‌و مه‌ترسییانه‌ی روبه‌ڕوومان بووه‌ته‌وه‌ یه‌كڕیزو یه‌ك ده‌نگ بین، هه‌روه‌ك چۆن هه‌موومان یه‌ك هه‌ڵوێست بووین بۆ روبه‌ڕوو بوونه‌وه‌ی داعش و هاوكاریكردنی به‌شه‌كانی تری كوردستانیش بۆ یه‌كتری مایه‌ی شانازیی هه‌موانه‌.

هه‌روه‌ك رێككه‌وتنی سه‌رجه‌م هێزو لایه‌نه‌كانی رۆژئاوای كوردستانیشی، به‌گرنگ و به‌بایه‌خه‌وه‌ هه‌ڵسه‌نگاندو به‌مایه‌ی شانازیی بۆ هه‌موان و ئایینده‌یه‌ی رۆشنی رۆژئاوای كوردستان و پرسی سیاسی و دیموكراسی نه‌ته‌وه‌كه‌مان له‌وبه‌شه‌ی كوردستاندا پێناسه‌ كرد.

هه‌ڤاڵ جێگری سكرتێری گشتی، رۆڵ و كاریگه‌ری هه‌ڤاڵ مام جه‌لال-یشی له‌و رووه‌وه‌ به‌رزنرخاند و ئاماژه‌ی بۆ ئه‌وه‌كرد، مێژوو شاهیده‌ كه‌ هه‌ڤاڵ مام جه‌لال هه‌میشه‌ به‌ته‌نگ یه‌كڕیزیی و یه‌ك هه‌ڵوێستی و یه‌كێتیی هێزه‌ سیاسییه‌كانه‌وه‌ بووه‌ له‌سه‌رجه‌م به‌شه‌كانی كوردستان، بۆیه‌ ئه‌مڕۆش كه‌ ئێوه‌ی هێزو لایه‌نه‌ سیاسییه‌كانی رۆژئاوای كوردستان ده‌بینێ، رێككه‌وتنتان كردووه‌، بێگومان له‌هه‌موو كه‌سێك زیاتر خۆشحاڵتر و ئاسووده‌ بووه‌.

 له‌لایه‌ن خۆشییه‌وه‌، هه‌ڤاڵ مه‌لا به‌ختیار، لێپرسراوی ده‌سته‌ی كارگێڕی، پاشئه‌وه‌ی ئاماژه‌ی بۆ ئه‌وه‌كرد: ئێستا كه‌ له‌لای جه‌نابی مام جه‌لال-ه‌وه‌ ته‌شریفتان هێناوه‌، به‌ڕێزی زۆر خۆشحاڵه‌، كه‌ هاوشانی ئه‌و سه‌ركه‌وتنه‌ عه‌سكه‌رییه‌ نمونه‌ییه‌ی له‌كۆبانی و له‌رۆژئاوای كوردستان، شه‌ڕه‌ڤانان به‌ده‌ستیان هێناوه‌ و بۆ مێژوو سه‌ری هه‌مومانتان به‌رزتر كرده‌وه‌ و رۆحی شه‌هیده‌كانی كوردستانیشیان شادتر كرد، ئه‌م سه‌ركه‌وتنه‌ سیاسییه‌شتان هاوتای ئه‌و سه‌ركه‌وتنه‌ عه‌سكه‌رییه‌یه‌ و بۆ مێژووی نه‌ته‌وه‌كه‌مان و بۆ به‌دیهێنانی مافی دیموكراسی نه‌ته‌وه‌كه‌مان، كارێكی گه‌وره‌و پیرۆزتان كردووه‌.

راشیگه‌یاند: دڵنیاین به‌جێبه‌جێكردنی ئه‌و رێككه‌وتنه‌ی له‌دهۆك و به‌سه‌رپه‌رشتی سه‌رۆكایه‌تی هه‌رێم و به‌پشتیوانی هه‌موولایه‌كمان كراوه‌، بێگومان به‌جێبه‌جێكردنی، ده‌توانن پرۆسه‌ی سیاسی، پرۆسه‌ی مقاوه‌مه‌ت و به‌دیهێنانی ده‌ستكه‌وته‌ دیموكراسییه‌كان له‌رۆژئاوای كوردستان، ببه‌نه‌ قۆناغێكی باڵاترو نموونه‌یه‌كی جوان له‌پێكه‌وه‌یی خه‌باتی سیاسی هێزه‌ كوردستانییه‌كانی رۆژئاوا، نموونه‌یه‌كی باش له‌جێبه‌جێكردنی ئه‌ركه‌ دیموكراسییه‌كان، له‌رۆژئاوای كوردستان به‌دیبهێنن.

هه‌ڤاڵ لێپرسراوی ده‌سته‌ی كارگێڕی، ئاماژه‌ی بۆ ئه‌وه‌شكرد، كه‌: دوژمنان و ناحه‌زان، ئه‌وانه‌ی به‌شێوه‌ی جۆراوجۆر سه‌یری ئێوه‌یان ده‌كرد و چاویان به‌و سه‌ركه‌وتنه‌ی له‌ڕۆژئاوای كوردستان به‌دیهاتووه‌و ئه‌و كانتۆنانه‌ی دامه‌زراون و ئه‌و مقاوه‌مه‌ته‌ی كراوه‌، ئه‌وانه‌ی چاویان هه‌ڵنه‌ده‌هات، قه‌ت چاوه‌ڕێشیان نه‌ده‌كرد، كه‌ ئێوه‌ بتوانن له‌نێوان خۆتاندا، گفتوگۆیه‌كی لێپرسراوانه‌ له‌ڕوانگه‌ی نه‌ته‌وه‌ییه‌وه‌، له‌ڕوانگه‌ی نیشتمانییه‌وه‌، له‌ڕوانگه‌ی مێژووییه‌وه‌ له‌نێوان خۆتاندا ئیمزا بكه‌ن و بگه‌نه‌ ئه‌م ئه‌نجامه‌ش.

دووپاتیشیكرده‌وه‌: هه‌رلایه‌كتان له‌خۆبوردویتان نواندبێ، هه‌رلایه‌كتان ته‌وازعتان نواندبێ، بۆ ئه‌وه‌ی ئه‌م رێككه‌وتنه‌ به‌دیبێت، هه‌رلایه‌كیش پشتیوانی كردبن، ده‌ستخۆشی لێده‌كه‌ین و جه‌ختیشیكرده‌وه‌: بێگومان هه‌مووتان شایه‌تن، كه‌ یه‌كێتیی، كه‌ مه‌كته‌بی سیاسی یه‌كێتیی، زۆر ماندووبوون بۆ ئه‌وه‌ی ئه‌م لێكتێگه‌یشتنه‌ له‌نێوانتاندا بێته‌دیی، كاریگه‌ری هێزه‌ سیاسییه‌كان و له‌نێوشیاندا سیاسه‌ت و بڕیاری یه‌كێتیی نیشتمانیی كوردستان، چ له‌گه‌ڵ هه‌ڤاڵانی په‌یه‌ده‌و له‌گه‌ڵ هه‌موو ئه‌و هه‌ڤاڵانه‌ی لێره‌ دانیشتوون، بێ ته‌مومژ و روون و ئاشكرابووه‌، بۆیه‌ له‌دوو ساڵی رابردوودا، یه‌كێتیی به‌هه‌موو توانایه‌كییه‌وه‌ هه‌وڵمانده‌دا، ئه‌م رێككه‌وتنه‌ جێبه‌جێ ببێ، چونكه‌ ته‌نها یه‌ك سیاسه‌ت، یه‌ك هه‌ڵوێست و ئامانجمان هه‌بووه‌، كه‌ ئه‌ویش ئه‌وه‌بووه‌ كه‌ ده‌بێ كێشه‌كان چاره‌سه‌ر بكرێن و ئه‌م رێككه‌وتنه‌ بێته‌دی.

هه‌ڤاڵ مه‌لا به‌ختیار، یه‌كگرتوویی هێزو لایه‌نه‌ سیاسییه‌كانی رۆژئاوای كوردستانیش، به‌مایه‌ی په‌یدابوونی پشتیوانییه‌كی گه‌وره‌تر بۆ رۆژئاوای كوردستان زانی، كه‌ ده‌توانێ كاریگه‌رییه‌كی گه‌وره‌ی له‌سه‌ر سیاسه‌تی هه‌رێمایه‌تیش هه‌بێ و دڵنیاشیكردنه‌وه‌، كه‌ پشتیوانی پارتی و یه‌كێتیی و هه‌موو هێزه‌كانی تری به‌شه‌كانی كوردستان و رای گشتیش له‌جیهانداو ره‌وه‌ندی كوردیش له‌ده‌ره‌وه‌و ناوه‌وه‌ی وڵات وه‌رده‌گرن.

وتیشی: كۆبانی راچه‌نینێكی نه‌ته‌وه‌یی بۆ رۆژئاوای كوردستان دروستكردو بوو به‌پشتیوانییه‌كی گه‌وره‌، بۆیه‌ ئه‌م سه‌ركه‌وتنه‌ سیاسییه‌ش، هاوتای سه‌ركه‌وتنه‌ عه‌سكه‌رییه‌كه‌ چووه‌ پێشه‌وه‌ و جێبه‌جێكردنیشی كارێكی گه‌وره‌یی مێژوییه‌، كه‌ دڵنیام له‌ڕووی دیپلۆماسی، له‌ڕووی ئیداریی، له‌ڕووی ئه‌منییه‌وه‌، له‌ڕووی كاریگه‌ری رێككه‌وتنه‌كه‌و ئه‌و ئه‌زمونه‌ی له‌رۆژئاوای كوردستان هه‌یه‌، بۆ به‌شه‌كانی تری كوردستانیش كاریگه‌ری زۆری ده‌بێ.
هیوایشخواست كه‌: هه‌موو هێزو لایه‌نه‌كان، هه‌موو هێزو توانای سیاسی و عه‌سكه‌ریی خۆیان بخه‌نه‌ كار، بۆ ئه‌وه‌ی سه‌ركه‌وتنی ئه‌زموونی رۆژئاوا بۆ جیهانی بسه‌لمێنن، كه‌ "رۆژئاوای كوردستان له‌ئاستی لێپرسراوێتی مێژوویی خۆیی و له‌ئاستی به‌دیهێنانی مافه‌ دیموكراسییه‌كانیدایه‌"و ده‌وڵه‌تانی دنیاش تێبگه‌ن كه‌ رۆژئاوای كوردستان ده‌هێنێ له‌وه‌ی ئێستا زیاتر پشتیواتنی لێ بكرێت.

هه‌ڤاڵ لێپرسراوی ده‌سته‌ی كارگێڕی، ئاماژه‌ی بۆ ئه‌وه‌شكرد، كه‌ پرسی مقاوه‌مه‌تی ئێوه‌ له‌به‌رامبه‌ر داعش، ده‌بێ ببێ به‌پرسێكی سیاسی بۆ پشتیوانی دایبینكردنی مافه‌ سیاسی و دیموكراسییه‌كانتان و ده‌بێ له‌بیرتان بێ كه‌ "كۆبانی خاڵی وه‌رچه‌رخان بوو له‌پشتیوانیكردن بۆ رۆژئاوای كوردستان" و رایگه‌یاند: ئه‌م رێككه‌وتنه‌ هه‌روه‌ك چۆن كاریگه‌ری له‌سه‌ر ئه‌گه‌ره‌كانی مان و نه‌مانی سه‌رۆكی سوریا و حكومه‌ته‌كه‌شی ده‌بێ، به‌هه‌مانشێوه‌، مایه‌ی دڵخۆشییه‌ بۆ هه‌موو ئه‌و شه‌ڕه‌ڤانانه‌ی له‌سیره‌ی تفه‌نگه‌وه‌ سه‌یری تیرۆریستان و دوژمنان ده‌كه‌ن و جه‌ختیشیكرده‌وه‌ كه‌: وه‌ك یه‌كێتیی، چی ترمان پێبكرێ، زیاتر له‌وه‌ی كردومانه‌، دڵنیابن له‌پشتیوانی و یارمه‌تیدانتان به‌رده‌وام ده‌بین و درێغی ناكه‌ین.

له‌لایه‌ن خۆشییانه‌وه‌، وه‌فدی ئه‌نجومه‌نی نیشتمانیی كوردی سوریا و وه‌فدی خۆبه‌ڕێوه‌به‌رێتی رۆژئاوای كوردستان، وێڕای سوپاسیان بۆ پێشوازییه‌كه‌ی مه‌كته‌بی سیاسی، سوپاسی پشتیوانی و هاوكارییه‌كانی یه‌كێتییان كرد، له‌پێناو یه‌كخستن و هاتنه‌دی یه‌كڕیزی نێوان حزب و لایه‌نه‌ سیاسییه‌كانی رۆژئاوای كوردستان. هاوكات ئاماژه‌یان به‌دیداره‌كه‌یان له‌گه‌ڵ سه‌رۆك مام جه‌لال كردو خۆشحاڵی خۆیان نیشانداو، تیایدا رۆڵی سه‌رۆك مام جه‌لال یان، له‌مێژووی خه‌بات و تێكۆشانی نه‌ته‌وه‌كه‌ماندا به‌رز نرخاندو، به‌ئاماژه‌كردنیش بۆ مێژووی خه‌باتی نه‌ته‌وه‌یی گه‌له‌كه‌مان، رۆڵ و كاریگه‌ری سه‌رۆك مام جه‌لال یان، له‌پێكهێنانی یه‌كه‌مین رێكخستنی پارتی له‌ساڵی (1954)داو له‌رۆژئاوای كوردستاندا وه‌بیرهێنایه‌وه‌و به‌بایه‌خه‌وه‌ هه‌ڵیانسه‌نگاند.

ئاماژه‌یان بۆ ئه‌وه‌شكرد، چۆن هۆلاكۆ له‌به‌رده‌م قه‌ڵای هه‌ولێردا به‌زی، ئێستاش بۆ ئه‌م قۆناغه‌ كه‌ یه‌كڕیزی و یه‌ك هه‌ڵوێستی سه‌رجه‌م هێزو لایه‌نه‌كانی كوردستانی پێویسته‌، تیرۆریستانی داعش، له‌كۆبانی، له‌شه‌نگال و له‌جه‌ولا له‌به‌رده‌م یه‌ك ئیراده‌یی نه‌ته‌وه‌كه‌ماندا شكستده‌هێنن و ئومێدیشیان خواست، كه‌ ئه‌م رێككه‌وتنه‌ سه‌ره‌تایه‌ك بێ بۆ به‌ستنی كۆنگره‌ی نه‌ته‌وه‌یی.

هه‌روه‌ك سوپاسی خۆیان ئاراسته‌ی سه‌رجه‌م هێزو لایه‌نه‌كانی باشوری كوردستان كرد، كه‌ پشتیوان و هاوكار بوون بۆ به‌ئه‌نجامگه‌یشتنی ئه‌و رێككه‌وتنه‌ی له‌نێوان هێزو لایه‌نه‌كانی رۆژئاوای كوردستان هاتۆته‌ ئاراوه‌.

PUKmedia راگه‌یاندنی لێپرسراوی ده‌سته‌ی كارگێڕی

فۆتۆ-ئه‌كره‌م ئه‌نوه‌ر