قوباد تاڵەبانی بۆ موسلیم: هاوكاریكردنی كۆبانێ‌ بەئەركی خۆمان دەزانین

ساڵح موسلیم سڵاوی خۆی بۆ سەرۆك تاڵەبانی نارد

قوباد تاڵەبانی لەكۆبوونەیەكدا لەگەڵا سالح موسلیم  رایگەیاند: هەموو هاوكاریەكان بۆ كۆبانێ‌ و بۆ كوردان لەهەرشوێنێكی دونیادا بن بەئەركی خۆمانی دەزانین و هەوڵدەدەین لەكۆدەنگیمان بۆ رۆژئاوا بەردەوامبین.

ئەمڕۆ 2014/10/21 ساڵح موسلیم هاوسەرۆكی پەیەدە لەتەلاری سەرۆكایەتی ئەنجومەنی وەزیران سەردانی قوباد تاڵەبانی جێگری سەرۆكی حكومەتی هەرێمی كوردستانی كرد.

بەمەبەستی گفتوگۆكردن دەربارەی دواگۆڕانكارییەكان و هاوكاری و هەماهەنگییەكانی نێوان هەرێمی كوردستان و شەڕەڤانانی كۆبانێ‌، قوباد تاڵەبانی جێگری سەرۆكی حكومەتی هەرێمی كوردستان پێشوازی لەساڵح موسلیم و وەفدێكی یاوەری كرد، كە پێكهاتبوو لە د.محەمەد رەشۆ و غەریب حەسۆ  نوێنەری پەیەدە لەهەرێمی كوردستان.

 لەدانیشتنێكدا باس لەرەوشی ئێستای كۆبانێ‌ و گەیشتنی هاوكارییە سەربازی و مرۆییەكان بۆ كۆبانێ‌ و پەیوەندییە سیاسی و دبلۆماسییە نێودەوڵەتییەكانی رۆژئاوا كرا. 
سالج موسلیم سوپاس و پێزانینی خۆی بۆ هاوكاری و هەماهەنگییەكانی هەرێمی كوردستانی بەجێگری سەرۆكی حكومەتی هەرێمی كوردستان راگەیاندو هیوای خواست پەیوەندی و پشتیوانییەكان بەردەوامییان هەبێت و سوپاسگوزاری سەركردایەتی سیاسی كوردستان بوو كە تواناو هەوڵەكانییان بۆ یەپەگەو كۆبانێ‌ چڕكردوەتەوە.

هاوسەرۆكی پەیەدە وتی: ئەو چالاكییانەی كە كوردان لەسەرتاسەری جیهاندا بۆ كوردانی كۆبانێ‌ ئەنجامییان دەدا، بۆ یەكڕیزی گەلەكەمان لە پرسە نەتەوەییەكەمان، ئاماژەیەكی گەورە بوو،  هەروەها باسی لە و تاوانانە كرد كە لەكۆبانێ‌ تیرۆریستان دژ بەمرۆڤایەتی ئەنجامی دەدەن كەوا لەگەڵا هیچ یاساو رێسایەكی نێودەوڵەتی یەكانگیرنابێتەوە.

هەروەها ساڵح موسلیم، سڵاو و خۆشەویستی خۆی لەڕێگەی جێگری سەرۆكی حكومەتی هەرێمی كوردستان بۆ سەرۆك مام جەلال نارد.

پاشان قوباد تاڵەبانی جێگری سەرۆكی حكومەتی هەرێمی كوردستان رایگەیاند: هاتنی ئێوە جێگای دڵخۆشیەو هەموو هاوكاری و هەماهەنگیەك بۆ كۆبانێ‌ و بۆ كوردان لەهەرشوێنێكی دونیادا بن بەئەركی خۆمانی دەزانین و هەوڵدەدەین لەكۆدەنگی و هاوكارییەكانمان بۆ رۆژئاوا بەردەوامبین ، كە ئەمە بنەمایەكی بەهێزە بۆ یەك ریزی گەلەكەمان.

لەلایەكی تر جێگری سەرۆكی حكومەتی هەرێمی كوردستان وتی: بوونی نوێنەرایەتی كوردانمان لە رۆژئاواو لە پایتەختی وڵاتاندا، بۆ هاوكارییە دبلۆماسی و سیاسی و مرۆیی و سەربازییەكان  بەگرنگ  و بەپێویستی دەزانم بەتایبەتی لەدۆخی ئێستای كۆبانێ‌ و ناوچەكەدا.      

هەروەها قوباد تاڵەبانی وتیشی: ئەوەی جێگای دڵخۆشی گەورەیە، كە میللـەتی ئێمە لە قەیرانەكاندا ئازایانەتر دەردەكەون، بۆیە یەك وتاری سیاسیی و یەك دەنگیمان بۆ پرسە نەتەوایەتیەكانمان، رێگا نادات نەیاران یاری بەچارەنوسی گەلەكەمان بكەن.

PUKmedia