هه‌وڵه‌كان بۆ ناساندنی جینۆسایدی ئێزیدییه‌كان به‌رده‌وامه‌

ره‌وه‌ندی كوردی هۆڵندیش پشتگیری ناساندنی ئه‌و تاوانه‌ ده‌كه‌ن

به‌مه‌به‌ستی روونكرده‌وه‌ی ئه‌و هه‌نگاوانه‌ی كه‌ ناویانه‌ له‌ پێناو ناساندنی ئه‌و جینۆسایده‌ی داعش له‌ دژی كوردانی ئیزیدی و پێكهاته‌ نه‌ته‌وه‌ییه‌كانی تر ئه‌نجامی داون، ئاڵَوگۆڕكردنی بیرو را بۆ هه‌نگاوه‌كانی داهاتوو، لیژنه‌ی باڵای ناساندنی جینوسادی كوردانی ئیزیدی و  پێكهاته‌  نه‌ته‌وه‌یی وئاینیه‌كانی تر به‌ سه‌رۆكایه‌تی مه‌حمود حاجی ساڵح سه‌رۆكی لیژنه‌كه‌، دوای ئه‌وه‌ی گه‌یشتنه‌ لاهای پایته‌ختی سیاسی هوڵندا له‌گه‌ڵ نوێنه‌ری لایه‌نه‌ كوردیه‌كان و ژماره‌یه‌ك له‌ره‌وه‌ندی كوردی ئه‌م شاره‌ كۆبوونه‌وه‌.

له‌و كۆبوونه‌وه‌یه‌دا مه‌حمود حاجی ساڵح وه‌زیری كاروباری شه‌هیدان و ئه‌نفالكراوان و سه‌رۆكی لیژنه‌كه‌ تیشكی خسته‌ سه‌ر ئه‌و هه‌نگاوانه‌ی كه‌ لیژنه‌كه‌یان له‌ ماوه‌ی رابردوودا كاری له‌سه‌ر كردووه‌، رایگه‌یاند: لیژنه‌كه‌ به‌ بڕیاری ئه‌نجومه‌نی وه‌زیران پێكهاتووه‌ و كاری له‌سه‌ر كۆكردنه‌وه‌ی به‌ڵگه‌ و دیكۆمێنت كردووه‌ و به‌شێوه‌یه‌كی دروست له‌ رێگای سه‌نته‌رێكی تایبه‌ت و كه‌سانی شاره‌زا لێكوڵینه‌وه‌ و دیداری له‌گه‌ڵ ئه‌و كه‌سانه‌دا كردوه‌ كه‌ له‌ ده‌ستی تاوانكارانی داعش رزگاریان بووه‌.

هه‌روه‌ك باسی له‌ هه‌ڵ و مه‌رجی سیاسی هه‌رێمی كوردستان و عیراق و ناوچه‌كه‌ كرد و كێشه‌ هه‌ڵواسراوه‌كانی نێوان هه‌رێم و عیراق و كاریگه‌ری له‌سه‌ر ژیان و گوزه‌رانی خه‌ڵك و بڕینی مووچه‌ و بوودجه‌ له‌ لایه‌ن حكومه‌تی مه‌ركه‌زی و ئاوه‌ره‌بوونی خه‌ڵكانی ناوه‌راست و باشووری عیراق و رۆژئاوا و شه‌نگال و ده‌ورووبه‌ری كه‌ كاریگه‌ری راسته‌وخۆی كردووه‌ته‌ سه‌ر  ژیانی هاووڵاتیانی هه‌رێمی كوردستان لایه‌نێكی تری باسه‌كه‌ بوو .

له‌ته‌وه‌رێكی تردا سه‌رۆكی لیژنه‌كه‌ ئامانجی سه‌ردانی لیژنه‌كه‌ی بۆ دادگای باڵای تاوانی نێو ده‌وڵه‌تی له‌ لاهای و دواتریش بۆ یه‌كیتی ئه‌روپا و ئه‌نجومه‌نی مافه‌كانی مرۆڤ له‌ جنیف روونكرده‌وه‌، هیوای خواست بتوانن سه‌رنجی ئه‌و دادگایه‌ بۆ  بابه‌تی جینۆسایدی كوردانی ئیزیدی رابكێشن تاكو داواكاری گشتی ئه‌و دادگایه‌ ئه‌و كه‌یسه‌ بجولێنێت و كاری له‌سه‌ر بكات و داوای له‌ ره‌وه‌ندی كورد و لایه‌نه‌ سیاسیه‌كانی كورد كرد، كه‌ به‌ راو سه‌رنجه‌كانیان هه‌نگاوه‌كانی داهاتوویان ده‌وڵه‌مه‌ند بكه‌ن.

له‌لایه‌ن خۆیانه‌وه‌ ره‌وه‌ندی كوردی له‌ هوڵندا چه‌ند سه‌رنج و تێبینیه‌كیان خسته‌ڕوو سه‌باره‌ت به‌ كاری لیژنه‌كه‌یان و ئاماده‌كاری خۆیان بۆ هه‌ر هاوكاریه‌ك نیشاندا كه‌ لیژنه‌كه‌ پێویستی پێبێت.

شایانی باسه‌ لیژنه‌ی ناساندی جینۆسایدی كوردانی ئیزیدی و پێكهاته‌ نه‌ته‌وه‌یی و ئاینیه‌كانی تر به‌ سه‌رۆكایه‌تی مه‌حمود حاجی سالح وه‌زیری  كاروباری شه‌هیدان و ئه‌ندامیه‌تی هه‌ر  یه‌ك له‌ محه‌مه‌د هاودیانی وه‌زیری كاروكاروباری كۆمه‌ڵایه‌تی و فه‌لاح مسته‌فا به‌رپرسی په‌یوه‌ندیه‌كانی ده‌ره‌وه‌ی ئه‌نجومه‌نی وه‌زیران و ئامانج ره‌حیم سكرتێری یاسایی سه‌رۆكایه‌تی ئه‌نجومه‌نی وه‌زیران و كه‌سایه‌تیه‌كی ئیزیدی به‌ناوی حسێن قاسم حه‌سو به‌ بڕیارێكی ئه‌نجومه‌نی وه‌زیران پێكهاتووه‌ و له‌ماوه‌ی رابردوو كاری له‌سه‌ر  كۆكردنه‌وه‌ی به‌ڵگه‌ نامه‌ و دیكومێنت كردوه‌ تاكو وه‌كو به‌ڵگه‌ی تاوانه‌كان پێشكه‌شی دادگای تاوانی نێو ده‌وڵه‌تی بكات له‌ لاهای بۆ ئه‌م مه‌به‌سته‌ش ئێستا سه‌رۆك و ئه‌ندامانی لیژنه‌كه‌ له‌ لاهای پایته‌ختی سیاسی هوڵندان.

PUKmedia فوئاد عوسمان